 |
| ពលរដ្ឋមកពីសហគមន៍ក្នុងខេត្តកោះកុង កំពុងឃ្លាំមើលសវនាការលើសកម្មជនការពារបរិស្ថាន ៣រូប គឺលោក សាន់ ម៉ាឡា លោក ទ្រី សុវីគា និងលោក ស៊ីម សំណាង នៅថ្ងៃទី២៧ ខែមិថុនា ឆ្នាំ២០១៦។ |
សកម្មជនបរិស្ថានបីនាក់ ជាសមាជិកអង្គការចលនាមាតាធម្មជាតិ ដែលទទួលរងការគំរាមកំហែង បំភិតបំភ័យសាជាថ្មីពីសំណាក់មន្ត្រីជាន់ខ្ពស់របស់រដ្ឋាភិបាល បានភៀសខ្លួនចេញពីកម្ពុជា ហើយកាលពីពេលថ្មីៗនេះ។ សកម្មជនទាំងនោះរួមមាន លោក សាន់ ម៉ាឡា លោក ទ្រី សុវីគា និងលោក ស៊ីម សំណាង។
លោក សាន់ ម៉ាឡា បានប្រាប់អាស៊ីសេរី ឲ្យដឹងនៅថ្ងៃទី២៦ មករា ថា ការគំរាមកំហែងនេះកើតមានឡើងក្រោយពេលដែលក្រុមរបស់លោកសម្រេចបន្តនីតិវិធីដាក់ពាក្យបណ្ដឹងទាស់ទៅតុលាការសាលាឧទ្ធរណ៍ ប្រឆាំងនឹងសាលក្រមរបស់សាលាដំបូងខេត្តកោះកុង ដែលបានកាត់ទោសឲ្យក្រុមរបស់លោកជាប់ពន្ធនាគារចំនួន ១ឆ្នាំ ៦ខែ ប៉ុន្តែអនុវត្តទោសត្រឹម ១០ខែ ១៥ថ្ងៃវិញ និងត្រូវបង់សំណងចំនួន ១០០លានរៀលក្នុងម្នាក់ៗ។
លោកបញ្ជាក់ថា បើទោះបីជាក្រុមរបស់លោកទទួលបានសេរីភាពឡើងវិញ កាលពីថ្ងៃទី១ ខែកក្កដា ឆ្នាំ២០១៦ កន្លងទៅនេះក៏ដោយ ការសម្រេចចិត្តដាក់បណ្ដឹងឧទ្ធរណ៍នេះគឺដោយសារតែក្រុមរបស់លោកមិនទទួលស្គាល់ចំពោះបទចោទប្រកាន់របស់តុលាការសាលាដំបូងខេត្តកោះកុង ហើយទាមទារឲ្យសាលាឧទ្ធរណ៍ទម្លាក់ចោលបទចោទប្រកាន់ទាំងអស់។
សាលាឧទ្ធរណ៍គ្រោងនឹងកោះហៅសកម្មជនទាំងបីរូបនេះឲ្យចូលបំភ្លឺនៅថ្ងៃទី៣១ ខែមករា ខាងមុខនេះ។
លោក សាន់ ម៉ាឡា បញ្ជាក់ថា ក្រុមរបស់លោកបានសម្រេចចិត្តភៀសខ្លួនទៅក្រៅប្រទេសមួយរយៈសិន។ លោកបានដាក់ការសង្ស័យថា ការគំរាមកំហែងមកលើក្រុមរបស់លោកសាជាថ្មីនេះ ដោយសារតែមានរឿងរ៉ាវពាក់ព័ន្ធនឹងបញ្ហាអំពើពុករលួយនៃការនាំចេញខ្សាច់ទៅប្រទេសសិង្ហបុរី នៅពេលថ្មីៗកន្លងទៅនេះ៕
RFA
ដោយ មាន ឫទ្ធិ
No comments:
Post a Comment