លោក ព្រហ្ម មរកត កំពុងសម្រាកវិស្សមកាលរយៈពេល១ខែនៅក្នុងប្រទេសកំណើត មុននឹង លោកត្រឡប់ទៅបន្តការសិក្សាផ្នែកគោលនយោបាយសាធារណៈ (¨¨Public Policy) មួយឆ្នាំទៀតនៅសាធារណៈរដ្ឋកូរ៉េ ដើម្បីបញ្ចប់ថ្នាក់អនុបណ្ឌិត។ មានលទ្ធភាពបានទៅបន្តការសិក្សានៅប្រទេសកូរ៉េខាងត្បូង គឺជាមោទនភាពមួយរបស់មរកត។ ប៉ុន្តែសម្រាប់លទ្ធភាពនេះ ក៏មិនមែនកើតឡើងដោយឯកឯងនោះដែរ។ យុវជនរូបនេះ ចង់ផ្ញើសារទៅកាន់យុវជនដទៃទៀតថា យុវជនត្រូវប្រឹងប្រែងកសាងសមត្ថភាពខ្លួនជាមុនសិន មុននឹងទទួលបានការផ្តល់តម្លៃពីមជ្ឈដ្ឋានខាងក្រៅ។
សម្រាកវិស្សមកាលមួយខែចន្លោះពីខែមករា និងកុម្ភៈនេះ និស្សិតផ្នែកគោលនយោបាយសាធារណៈ លោក ព្រហ្ម មរកត បានសម្រេចចិត្តមិននៅមើលព្រិលធ្លាក់នៅក្នុងប្រទេសកូរ៉េនោះឡើយ។ បន្ទាប់ពីសិក្សាបានរយៈពេល៦ខែនៅសកលវិទ្យាល័យ យ៉ុងណាម (Yeungnam University) នៃខេត្តជុងសាន (Gyeongsan) ក្នុងប្រទេសកូរ៉េខាងត្បូង លោក មរកត សុខចិត្តមកប្រទេសកំណើតវិញ។ មរកត ត្រូវត្រឡប់មកជួបក្រុមគ្រួសារផង និងម្យ៉ាងទៀត ត្រូវមកជួយការងារនៅក្នុងលេខាធិការដ្ឋាននៃសហភាពសហព័ន្ធយុវជនកម្ពុជាផង។ គឺថ្នាក់ដឹកនាំនៃសហភាពសហព័ន្ធយុវជនកម្ពុជានេះហើយ ដែលបានសម្រេចផ្តល់អាហារូបករណ៍របស់ធនាគារ Industrial Bank of Korea ទៅឲ្យមរកត ដើម្បីមរកតអាចសិក្សាជំនាញគោលនយោបាយ សាធារណៈនៅក្នុងប្រទេសកូរ៉េបាន។
នៅក្នុងហាងកាហ្វេ Gloria Jean’s ក្នុងសង្កាត់បឹងកេងកង1 បុរសសម្បុរស្រអែម ដែលស្លៀកពាក់ឯកសណ្ឋានសហភាពសហព័ន្ធយុវជនកម្ពុជាដែលគេស្គាល់បានតាមរយៈស្លាកសញ្ញាដែលដេរភ្ជាប់លើអាវក្រណាត់ពណ៌ផ្ទៃមេឃស្រាលនោះ កំពុងអង្គុយធ្វើការនៅទល់មុខកំព្យូទ័រយូរដៃរបស់ខ្លួន មុននឹងជួបជាមួយអ្នកកាសែតនៃសារព័ត៌មានថ្មីៗ។ សម្រាប់យុវជនអាយុ៣២ឆ្នាំរូបនេះ នៅទីណាក៏គេអាចធ្វើអ្វីមួយសម្រាប់អនាគតខ្លួនឯង និងសម្រាប់សង្គមជាតិរបស់ខ្លួនបានដែរ។ ហើយនេះគឺជាអ្វីដែល មរកតបានធ្វើក្លាយជាទម្លាប់រួចមកហើយ តាំងពីមរកតនៅសិក្សាឆ្នាំទី៣ផ្នែកបច្ចេកវិទ្យាព័ត៌មាននៅសាកលវិទ្យាល័យភូមិន្ទភ្នំពេញមកម្លេះ។ កាលណោះ ក្នុងអំឡុងឆ្នាំ២០០៤ ពេលកំពុងសិក្សា មរកត ចាប់ផ្តើមធ្វើការងារស្ម័គ្រចិត្តឲ្យសមាគមយុវជនកម្ពុជាដែលក្រោយមកក្លាយជាសហភាពសហព័ន្ធយុវជនកម្ពុជា។ មរកត តែងតែយកការងារដែលគាត់កំពុងធ្វើជាដើមទុនសម្រាប់ផ្តល់ឱកាសដល់ខ្លួនឯងនៅថ្ងៃអនាគត។ និយាយបែបប្រយ័ត្នប្រយែង មរកត រម្លឹកពិសោធន៍របស់ខ្លួនយ៉ាងដូច្នេះ៖«បើខ្ញុំមិនបានចូលរួមធ្វើការងារស្ម័គ្រចិត្តតាំងពីនៅរៀន ខ្ញុំមិនស្គាល់សមាគមយុវជនកម្ពុជា ហើយខ្ញុំក៏មិនបានធ្វើការនៅអគ្គលេខាធិការដ្ឋាន ស.ស.យ.ក នេះដែរ។ ហើយបើសិនជាខ្ញុំមិនបានខិតខំសន្សំលុយ ដើម្បីឆ្លៀតរៀនភាសាអង់គ្លេស តាំងពីខ្ញុំនៅធ្វើជាអ្នកបញ្ចូលទិន្នន័យផ្នែកអត្រានុកូលដ្ឋាននៅក្រសួងមហាផ្ទៃ ខ្ញុំក៏គ្មានទុនភាសាអង់គ្លេស ដើម្បីសិក្សានៅប្រទេសកូរ៉េដូចសព្វថ្ងៃនេះដែរ»។
គំនិតខ្លួនឯងដែលគិតថា «ត្រូវប្រឹងប្រែងខ្លួនឯង ដើម្បីអ្នកដទៃផ្តល់តម្លៃឲ្យតាមក្រោយ» រឹតតែជាក់ស្តែងថែមទៀតសម្រាប់មរកត នៅពេលដែលយុវជនរូបនេះបានសិក្សានៅសាធារណរដ្ឋកូរ៉េកន្លងមក ហើយរូបគេបានសិក្សាអំពីប្រវត្តិនៃការកសាងសេដ្ឋកិច្ចរបស់កូរ៉េខាងត្បូងមួយនេះ ពីភ្នក់ភ្លើងសង្គ្រាម ឲ្យក្លាយជាប្រទេសអភិវឌ្ឍន៍។ មរកត រម្លឹកថាប្រទេសកូរ៉េខាងត្បូងក៏ធ្លាប់ធ្លាក់ដល់ចំនុចសូន្យ ដោយសារសង្គ្រាម ដូចកម្ពុជាដែរ។ ក៏ប៉ុន្តែ បើតាមការបញ្ជាក់របស់ មរកត រដ្ឋាភិបាល និងប្រជាជនកម្ពុជាកូរ៉េ បានរួមគ្នាអនុវត្តគោលនយោបាយជាតិមួយឈ្មោះថា «ភូមិថ្មី»ដើម្បីលើកស្ទួយសេដ្ឋកិច្ចកូរ៉េ។ នៅក្នុងហាងកាហ្វេទំនើប ដែលអ៊ូរអដោយសំឡេងបទចម្រៀងអង់គ្លេស និងអតិថិជនចេញចូល មរកត និយាយអំពីគោលនយោបាយភូមិថ្មីរបស់កូរ៉េ យ៉ាងប្រាកដប្រជា យ៉ាងដូច្នេះ៖«ក្នុងឆ្នាំ១៩៧០ កូរ៉េ បានចាប់ផ្តើមអនុវត្តចលនាភូមិថ្មី ដែលមានស្មារតីសំខាន់៣៖ ទីមួយ គឺការព្យាយាម (diligence) ទី២ គឺម្ចាស់ការលើខ្លួនឯង (self-help) និងទី៣ គឺសហប្រតិបត្តិការ (cooperation )»។
ចំពោះមរកត គឺដោយសារតែកូរ៉េខិតខំប្រឹងប្រែងខ្លួនឯង ទើបពិភពលោកផ្តល់តម្លៃ និងស្ញប់ស្ញែងកូរ៉េតាមក្រោយ។ មរកត សម្តែងអារម្មណ៍មោទនយ៉ាងខ្លាំងនៅពេលដែលខ្លួនបានទៅបន្តការសិក្សានៅក្នុងប្រទេសកូរ៉េ ហើយលោកជឿជាក់ថា លោកនឹងអាចប្រើប្រាស់ចំណេះដឹងថ្មីនេះចួលរួមជួយអភិវឌ្ឍកម្ពុជារបស់លោក។
មរកត ត្រូវបន្តការសិក្សាមួយឆ្នាំទៀត ដើម្បីបញ្ចប់ថ្នាក់អនុបណ្ឌិតផ្នែកគោលនយោបាយសាធារណៈ។ នៅចុងឆ្នាំសិក្សានេះ មរកត មានគម្រោងសរសេរនិក្ខេបទស្តីអំពីការអនុវត្តច្បាប់ចរាចរណ៍ផ្លូវគោក ដែលបើតាមការយល់ឃើញរបស់និស្សិតខ្មែររូបនេះ ច្បាប់ចរាចរណ៍ផ្លូវគោកសព្វថ្ងៃទំនងជានៅមានបញ្ហា ទើបធ្វើឲ្យពលរដ្ឋមិនបានចូលរួមឲ្យមានប្រសិទ្ធភាព។ គួរបញ្ជាក់ថា នៅក្នុងលេខាធិការដ្ឋាននៃសហភាពសហព័ន្ធយុវជនកម្ពុជា មរកត បានទទួលការងារជាអ្នកសម្របសម្រួលកម្មវិធីអនុវត្តការគោរពចរាចរណ៍ផ្លូវគោក ដែលធ្វើឲ្យមរកត មានពិសោធន៍ និងចំណេះដឹងច្រើនក្នុងវិស័យនេះ។
និយាយដល់ត្រង់នេះ មរកត ហាក់មិនមានការលំបាកនៅក្នុងការសិក្សាប៉ុន្មានឡើយ។ ការងារ និងពិសោធន៍របស់យុវជន ព្រហ្ម មរកត ពីអតីតកាលកំពុងតែបម្រើជាប្រយោជន៍សម្រាប់ការសិក្សារបស់មរកតក្នុងពេលបច្ចុប្បន្ននេះ។ ភាសាអង់គ្លេស ការងារស្ម័គ្រចិត្តផ្នែកចរាចរណ៍ និងការងារស្ម័គ្រចិត្តនៅសហភាពសហព័ន្ធយុវជនកម្ពុជា ទាំងអស់នេះសុទ្ធតែបានផ្តល់ឱកាសឲ្យ មរកត អភិវឌ្ឍន៍ចំណេះដឹងឡើងមួយកម្រិតទៀត។ សម្រាប់ មរកត យុវជនត្រូវប្រើឱកាសមួយ ដើម្បីបង្កើតឱកាសមួយថ្មីទៀត៕
ថ្មិៗ
អត្ថបទ : លាង ដឺលុច
No comments:
Post a Comment