ភ្នំពេញ៖ ឯកអគ្គរដ្ឋទូតអាមេរិកប្រចាំកម្ពុជា បានរំឮកថា លោកតែងតែនឹងគិតដល់លោក ជា វិជ្ជា អតីតប្រធានសហជីពសេរី ដែលត្រូវបានឃាតករបាញ់សម្លាប់ កាលពីឆ្នាំ២០០៤។ ទូតអាមេរិក ចាត់ទុកសពលោក ជា វិជ្ជា គឺជាសំលេងដ៏ពិតប្រាកដរបស់កម្មករកាត់ដេរ។
សេចក្ដីថ្លែងការណ៍របស់ឯកអគ្គរដ្ឋទូតអាមេរិកលោក William Heidt នៅលើហ្វេសប៊ុកស្ថានទូតអាមេរិក ដែលមានទាំងសំណេរជាអង់គ្លេស និងខ្មែរនោះ បានអត្ថាធិប្បាយយ៉ាងដូច្នេះថា៖«ខ្ញុំបានស្គាល់លោក ជា វិជ្ជាយ៉ាងច្បាស់ នៅពេលខ្ញុំធ្វើការនៅក្នុងស្ថានទូតអាមេរិក ពីឆ្នាំ ១៩៩៧ ដល់ឆ្នាំ ១៩៩៩។ នៅពេលនោះ ខ្ញុំគឺជាមន្ត្រីទទួលបន្ទុកបញ្ហាការងារ និងសេដ្ឋកិច្ច ហើយលោក ជា វិជ្ជាគឺជាប្រធានសហជីពសេរី។ យើងបានជួបគ្នាជាញឹកញាប់ ដើម្បីពិភាក្សាពីការអភិវឌ្ឍនៃសហជីព នៅប្រទេសកម្ពុជា។ យើងមិនបានយល់ស្របគ្នាលើគ្រប់បញ្ហាទេ តែខ្ញុំតែងតែជឿថា លោកគឺជាសំលេងដ៏ពិតប្រាកដរបស់កម្មករ កម្មការិនីកម្ពុជា»។
ក្រៅពីនេះលោកទូតអាមេរិករូបនេះ បានមើលឃើញថា ការលះបង់របស់សពលោក ជា វិជ្ជា ដើម្បីជីវភាពកម្មករកាត់ដេរ អាចរស់នៅប្រកបដោយភាពសមរម្យ និងថ្លៃថ្នូរនោះ ក៏មិនមែនខាតបង់ដោយអត់ប្រយោជន៍ដែរ ។«ខ្ញុំមានចិត្តរីករាយដោយស្ថានភាពនៃកម្មករកាត់ដេរកម្ពុជាមានភាពប្រសើរឡើងច្រើន តាំងពីទសវត្សឆ្នាំ ១៩៩០ មក ដោយសារការខិតខំរបស់រដ្ឋាភិបាល ម្ចាស់រោងចក្រ និងការខិតខំរបស់ពលរដ្ឋដែលមានការប្តេជ្ញាចិត្តខ្ពស់ ដូចជាលោក ជា វិជ្ជា»។ នេះជាការមើលឃើញរបស់លោក Heidt។
គួរបញ្ជាក់ថា លោក ជា វិជ្ជា ត្រូវបានឃាតករបាញ់សម្លាប់ កាលពីថ្ងៃទី២២ មករា ឆ្នាំ២០០៤ នៅតូបលក់កាសែតមួយកន្លែងជាប់របងវត្តលង្ការ។ ក្រោយការស្លាប់របស់លោក ជា វិជ្ជា សមត្ថកិច្ចបានចាប់ខ្លួនជនសង្ស័យពីរនាក់ គឹលោក សុក សំអឿន និងលោក ប៊ន សំណាង ដែលត្រូវបានតុលាការសម្រេចឃុំខ្លួន៥ឆ្នាំ ហើយដោះលែងពួកគេឲ្យនៅក្រៅឃុំវិញ នៅចុងឆ្នាំ២០០៨។ ប៉ុន្តែនៅចុងឆ្នាំ២០១២ ជនសង្ស័យទាំងពីរនាក់នេះ ត្រូវបានសាលាឧទ្ធរណ៍សម្រេចផ្ទនាទោសជាប់ពន្ធនាគារ២០ឆ្នាំម្ដងទៀត មុននឹងតុលាការកំពូលសម្រេចដោះលែងឲ្យមានសេរីភាពវិញ កាលពីថ្ងៃខែកញ្ញា ឆ្នាំ២០១៣។
តែយ៉ាងណាលោក ជា មុនី ប្អូនប្រុសបង្កើតលោក ជា វិជ្ជា ចាត់ទុកថា ការចាប់ឃុំខ្លួន លោក សុក សំអឿន និងលោក ប៊ន សំណាង នេះគឺគ្រាន់តែជាការបំភ័ន្តភ្នែកមហាជន ដែលឃុំខ្លួនពួកគេទាំងមិនមានកំហុសប៉ុណ្ណោះ។ គ្រួសារសពលោក ជា វិជ្ជា នៅតែទាមទារឲ្យប្រព័ន្ធយុត្តិធម៌ស្វែងរកឃាតករពិត និងអ្នកនៅពីក្រោយខ្នងនៃការបាញ់សម្លាប់លោក ជា វិជ្ជា មកផ្តន្ទាទោសតាមច្បាប់៕
ថ្មីៗ
អត្ថបទ : ធឿន បញ្ញាឬទិ្ធ
No comments:
Post a Comment