ប្រធានាធិបតីអាមេរិកលោក ដូណាល់ ត្រាំ ចុះហត្ថលេខាលើបទបញ្ជាប្រតិបត្តិមួយនៅថ្ងៃសុក្រ ២៧ មករា ដើម្បីចាប់ផ្តើមគម្រោងកសាងអំណាចយោធាអាមេរិកឲ្យកាន់តែខ្លាំងក្លាឡើងវិញ។ លោកបានសន្យាថា រដ្ឋបាលអាមេរិកនឹងផ្តោតសំខាន់លើការបង្កើនធនធានហិរញ្ញវត្ថុសម្រាប់វិស័យយោធា និងផ្តល់នាវាចម្បាំងនិងយន្តហោះថ្មីបន្ថែមសម្រាប់គាំទ្រការកសាងអំណាចយោធាអាមេរិកនេះ។
«អំណាចយោធារបស់យើងមិនអាចមានអ្នកប្រៀបបានឡើយ ហើយការប្រឹងប្រែងកសាងសន្តិភាពរបស់អាមេរិកក៏មិនអាចមានអ្នកស្មើដូចគ្នា។ យើងពិតជាចង់បានសន្តិភាពណាស់»។ នេះជាការបញ្ជាក់របស់ប្រធានាធិបតី ដូណាល់ ត្រាំ ក្នុងពេលដែលលោកចេញបទបញ្ជាកសាងអំណាចយោធាអាមេរិកឡើងវិញនាថ្ងៃសុក្រទី ២៧មករា។
យោងតាមទីភ្នាក់ងារ AFP ប្រធានាធិបតីអាមេរិករូបនេះបានបញ្ជាក់ផងថា គម្រោងស្នើសុំបង្កើនថវិកាជាតិសម្រាប់ប្រើប្រាស់លើវិស័យការពារជាតិប្រាកដនឹងត្រូវស្វាគមន៍ដោយសមាជិកសភាអាមេរិកនៅពេលខាងមុខ។
ទោះជាយ៉ាងណាក៏ដោយ បទបញ្ជាថ្មីនេះហាក់បីដូចមិនបានកំណត់ច្បាស់លាស់ពីយុទ្ធសាស្ត្រដំកំភួនដែលអាមេរិកត្រូវធ្វើសម្រាប់បង្កើនសមត្ថភាពយោធាឡើយ។ គ្រាន់តែវាដាក់បទបញ្ជាឲ្យក្រសួងពាក់ព័ន្ធចាប់ផ្តើមត្រួតពិនិត្យមើលសមត្ថភាពនិងរៀបចំសមត្ថភាពទ័ពឲ្យបានរៀបរយដើម្បីឈានទៅកំណត់ទំហំថវិកាជាតិដែលត្រូវស្នើសុំទៅសភា។
ពាក់ព័ន្ធបញ្ហានេះ លោក ដូណាល់ ត្រាំ បានបញ្ជាក់ច្បាស់ក្នុងពេលឃោសនាបោះឆ្នោត និងប៉ុន្មានសប្តាហ៍កន្លងផុតទៅថា លោកចង់បង្កើនអំណាចកងទ័ពអាមេរិកដោយបន្ថែមចំនួននាវាចម្បាំងជើងទឹក និងបង្កើនចំនួនយន្តហោះចម្បាំង។ ជាឧទាហរណ៍ រដ្ឋបាលថ្មីចង់បង្កើននាវាចម្បាំងឲ្យកងទ័ពអាមេរិកបន្ថែមឲ្យដល់ ៣៥០គ្រឿង។ បច្ចុប្បន្ននេះអាមេរិកមាននាវាកងទ័ពជើងទឹកសរុប្រហែលត្រឹម ២៧៤គ្រឿងប៉ុណ្ណោះ។
ប្រធានាធិបតីរូបនេះក៏បានបញ្ជាឲ្យរដ្ឋមន្ត្រីការពារថ្មីរបស់ខ្លួនលោក James Mattis ចាប់ផ្តើមបង្កើនសកម្មភាពប្រយុទ្ធប្រឆាំងភេរវកម្មជាពិសេសក្រុមភេរវជនរដ្ឋឥស្លាម នៅស៊ីរី និងអ៊ីរ៉ាក់ ដោយបន្ថមសព្វាវុធដូចជាកាំភ្លើងធំ និងយន្តហោះប្រយុទ្ធ។ បន្ថែមពីនេះ បទបញ្ជាថ្មីក៏ផ្តោតលើការពង្រឹងការពារសន្តិសុខអ៊ីនធឺណិត និងប្រឆាំងរាល់ការគំរាមកំហែងពីខាងក្រៅដូចគ្នា។
បទបញ្ជាដដែលនេះក៏បានដាក់សម្ពាធឲ្យមន្ទីប៉ង់តាហ្កូនកាត់បន្ថយការចំណាយលើកម្មវិធីផលិតសព្វាវុធខ្លះដែលថ្លៃៗពេកដូចគ្នា។ មុនមានការដាក់បទបញ្ជា លោក James Mattis បានបញ្ជាឲ្យគេត្រួតពិនិត្យឡើងវិញការចំណាយលើកម្មវិធីផលិតសព្វាវុធធំៗចំនួនពីរក្នុងនោះមានគម្រោងផលិតយន្តហោះ F-35 ដែលមានទំហំ ៤០០ពាន់លានដុល្លារ និងគម្រោងផលិតយន្តហោះប្រធានាធិបតីថ្មីដែលមានទំហំ ៤ពាន់លានដុល្លារផងដែរ៕
ថ្មីៗ
អត្ថបទ : សៅ ផលនិស្ស័យ
No comments:
Post a Comment