ប្រធានាធិបតីហ្វីលីពីន Rodrigo Duterte នៅថ្ងៃទី២៦ ខែមករា បានសុំទោសប្រជាជនកូរ៉េខាងត្បូង ចំពោះករណីឃាតកម្មលើពាណិជ្ជករកូរ៉េខាងត្បូង Jee Ick-Joo ដែលគេសង្ស័យថា ជាស្នាដៃរបស់ប៉ូលិសហ្វីលីពីន។ លោក Duterte ក៏សន្យានាំជនដៃដល់យកមកកាត់ទោសឲ្យខាងតែ និងបានថែមទាំងគំរាមកាត់ក្បាលជនដៃដល់ទៀតផង។ ស្របគ្នានេះ ព្រឹទ្ធសភាហ្វីលីពីន ក៏កំពុងបើកការស៊ើបអង្កេតលើករណីឃាតកម្មនេះផងដែរ។
ករណីឃាតកម្ម និងចាប់ជំរិតលើអ្នកជំនួញកូរ៉េខាងត្បូង Jee Ick-Joo កំពុងតាមលងរដ្ឋបាលប្រធានាធិបតីហ្វីលីពីន Rodrigo Duterte ។ លោក Duterte ក៏ប្រកាសថា មន្ត្រីប៉ូលិសដែលទទួលខុសត្រូវលើករណីនេះ ត្រូវតែទទួលទោសដាច់ខាត។ ថ្លែងទៅកាន់អ្នកចូលរួមក្នុងកម្មវិធីសម្ពោធរោងចក្រថាមពលនៅថ្ងៃទី២៦ ខែមករា ដែលមានទាំងអ្នកវិនិយោគជនជាតិកូរ៉េខាងត្បូងដែរនោះ លោក Duterte សន្យាចំពោះមុខពួកគេថា ជនដៃដល់នឹងត្រូវចូលពន្ធនាគារមិនខាន។
«ខ្ញុំសូមធានាថា អ្នកនៅពីក្រោយឃាតកម្មនេះ ត្រូវបានស្គាល់មុខអស់ហើយ។ ពួកគេ នឹងត្រូវចាប់បញ្ចូលគុក ព្រមទាំងត្រូវកាត់ទោសឲ្យធ្ងន់ធ្ងរទៀតផង។»នេះពាក្យសន្យារបស់ប្រធានាធិបតីហ្វីលីពីនទៅកាន់អ្នកចូលរួម មុននឹងនិយាយថា អ្នកនៅពីក្រោយឃាតកម្មលើអ្នកជំនួញកូរ៉េខាងត្បូង Jee Ick-Joo គឺជាមន្ត្រីប៉ូលិសតែម្ដង។
បើតាមសារព័ត៌មាន Rappler ជាមួយនឹងការប្រើប្រាស់ពាក្យសម្ដីធ្ងន់ៗ លោកប្រធានាធិបតី Duterte អះអាងថា លោកនឹងមិនទុករឿងនេះចោលឡើយ ហើយមន្ត្រីប៉ូលិសដែលជាប់ពាក់ព័ន្ធ នឹងត្រូវទទួលទោស។ លើសពីនោះ ប្រធានាធិបតីដែលល្បីខាងប្រើធម៌ក្ដៅរូបនេះ ក៏គំរាមកាត់ក្បាលប៉ូលិសដែលមានកំហុសបញ្ជូនទៅឲ្យកូរ៉េខាងត្បូងទៀតផង។ លោក Duterte ក៏បានសុំទោសប្រជាជនកូរ៉េខាងត្បូងទាំងអស់ចំពោះការស្លាប់របស់លោក Jee Ick-Joo ដែរ។
ករណីឃាតកម្មលើកនេះ បង្កផលប៉ះពាល់យ៉ាងខ្លាំងដល់មុខមាត់ប៉ូលិសហ្វីលីពីន ដែលកំពុងដឹកមុខក្នុងយុទ្ធនាការបង្ក្រាបគ្រឿងញៀនរបស់ប្រធានាធិបតី Duterte ។ វាមានការស្នើឲ្យមេប៉ូលិសហ្វីលីពីន Ronald de la Rosa លាលែងពីតំណែងដើម្បីបង្ហាញការទទួលខុសត្រូវផងដែរ។ ប្រភពព័ត៌មានខាងលើបន្តថា ក្រុមអ្នកចាប់ជំរិតអះអាងថា លោក Jee Ick-Joo ជាដៃស្ដាំរបស់ឈ្មួញគ្រឿងញៀន Albert Chua និងបានទារប្រាក់រំលស់៥លានពឺសូ។
យ៉ាងណាក្ដី អ្នកជំនួញ Jee Ick-Joo ត្រូវបានធ្វើឃាតក្នុងបន្ទាយប៉ូលិស Camp Crame ដែលជាទីស្នាក់ការរបស់ប៉ូលិសជាតិហ្វីលីពីនតែម្ដង។ ក្រសួងយុត្តិធម៌ហ្វីលីពីនបញ្ជាក់ថា មន្ត្រីប៉ូលិស បានឃាត់ខ្លួនអ្នកជំនួញរូបនេះនៅក្នុងផ្ទះរបស់លោក នៅក្រុង Angeles នៅថ្ងៃទី១៨ តុលា ឆ្នាំ២០១៦ ដោយក្រុមមន្ត្រីទាំងនោះ បានប្រកាសថា ពួកគេ កំពុងស្វែងរកផ្ទះដែលផ្ទុកគ្រឿងញៀន ហើយក្រោយមកទៀត បាននាំខ្លួនទៅកាន់ទីស្នាក់កណ្តាលរបស់ប៉ូលិស និងសម្លាប់តែម្តងទៅ៕
ថ្មីៗ
អត្ថបទ : តន ចាន់រិទ្ធារ៉ា
No comments:
Post a Comment