 |
| កសិករកម្ពុជា ដឹកផលស្រូវរបស់ខ្លួនដើម្បីលក់ឲ្យឈ្មួញតាមព្រំដែនកម្ពុជា-ថៃ នាពេលកន្លងមក។ ជរ សុគន្ធា |
ភ្នំពេញ៖(ខ្មែរថាមស៍)អនុស្សរណៈយោគយល់គ្នារវាងប្រទេសកម្ពុជានិងប្រទេសថៃក្នុងការប្រើប្រាស់កំពង់ផែឡាំចាបាំង(Laem Chabang) របស់ថៃដើម្បីដឹកជញ្ជូនផលិតផលកសិផលរបស់កម្ពុជា ឆ្លងកាត់ប្រទេសថៃ ទៅកាន់ប្រទេសទី៣ទំនងជានឹងលេចរូបរាងឡើងនៅពាក់កណ្តាលឆ្នាំនេះបន្ទាប់ពីកម្ពុជាបានបញ្ជូនលិខិតពាក់ព័ន្ធកិច្ចព្រមព្រៀងនេះតាំងពីខែមិថុនាឆ្នាំមុន។នេះបើយោងតាមអ្នកនាំពាក្យនៃក្រសួងពាណិជ្ជកម្មកម្ពុជា។
លោកស្រី ស៊ឹង សុផារី អ្នកនាំពាក្យនៃក្រសួងពាណិជ្ជកម្ម បានឲ្យដឹងថាអនុស្សរណៈយោគយល់គ្នារវាងប្រទេសកម្ពុជា និងថៃ និងឯកសារទាក់ទងផ្សេងៗទៀតគឺកំពុងតែដំណើរការរវាងប្រទេសទាំងពីរដូច្នេះក្រសួងនឹងចេញលិខិតជូនដំណឹងជាផ្លូវការមួយនៅពេលភាគីទាំងពីរព្រមព្រៀងគ្នាលើអនុស្សរណៈយោគយល់គ្នានេះ។ លោកស្រីនិយាយថា រដ្ឋាភិបាល ពិតជាយល់ពីទុកលំបាករបស់វិស័យឯកជនដែលកំពុងប្រឈមលើការដឹកជញ្ជូន ប៉ុន្តែរដ្ឋាភិបាល កំពុងធ្វើកិច្ចការនេះ ដោយលោកស្រីឲ្យរង់ចាំរហូតដល់ពាក់កណ្តាលឆ្នាំ២០១៧ នេះ។
លោកស្រីសុផារីថ្លែងបញ្ជាក់ថា៖«ក្រសួងនឹងចេញលិខិតផ្លូវការជូនសាធារណជននៅពេលដែលប្រទេសទាំង២ចុះហត្ថលេខាលើអនុស្សរណៈយោគយល់គ្នារវាងប្រទេសកម្ពុជា និងថៃ ក្នុងការប្រើប្រាស់កំពង់ផែថៃ ឡាំចាបាំង នេះ ឥឡូវយើងកំពុងធ្វើការផ្សេងៗ ពីព្រោះការងារអនុស្សរណៈយោគយល់គ្នានេះមិនមែនជាអាទិភាពចម្បងទេ យើងនឹងជូនដំណឹងនៅពាក់កណ្តាលឆ្នាំនេះ»។
លោកស្រីថា៖ «យើងមិនអាចនិយាយអ្វីបានទេនាពេលនេះពីកិច្ចព្រមព្រៀងនេះ យើងដឹងពីផលលំបាករបស់វិស័យឯកជនដែលបានជួបប្រទះ ប៉ុន្តែយើងមិនអាចនិយាយបានទេឥឡូវ ពីព្រោះវាកំពុងដំណើរការ យើងនឹងដឹងនៅពាក់កណ្តាលឆ្នាំនេះ»។ លោកស្រីបានឲ្យដឹងថា នាំចេញផលិតផលកសិផលកម្ពុជា ទៅប្រទេសថៃ នៅមានសភាពធម្មតា។
នាពេលបច្ចុប្បន្ននេះ មិនមានកិច្ចព្រមព្រៀងណាមួយក្នុងការនាំចេញផលិតផលកសិផលកម្ពុជា ឆ្លងកាត់តាមកំពង់ផែថៃ នោះទេ ខណៈផលិតផលកសិផលកម្ពុជា មិនត្រូវបានអនុញ្ញាតឲ្យដឹកឆ្លងកាត់ ឬចូលតាមកំពង់ផែថៃ។
រដ្ឋមន្ត្រីពាណិជ្ជកម្មកម្ពុជា លោក ប៉ាន សូរស័ក្ត កាលពីខែមិថុនា ឆ្នាំមុនបានស្នើដល់រដ្ឋមន្ត្រីពាណិជ្ជកម្មថៃ នៅពេលលោកចូលរួមប្រជុំ CLMVT នៅថៃ ថា កម្ពុជា និងថៃ គួរតែមានអនុស្សរណៈយោគយល់គ្នាមួយដើម្បីសម្រួលដល់ការដឹកទំនិញកសិផលពីកម្ពុជា ឆ្លងកាត់ប្រទេសថៃ ទៅកាន់ប្រទេសទី៣ ដោយប្រើប្រាស់កំពង់ផែ ឡាំចាបាំង របស់ថៃ។
លោករដ្ឋមន្ត្រីបន្ថែមថា កម្ពុជា មិនយកផលិតផលកសិកម្មទៅលក់នៅប្រទេសថៃ ទេ គឺគ្រាន់តែដឹកទំនិញទាំងនោះឆ្លងកាត់ដើម្បីបញ្ជូនទៅប្រទេសទី៣ តែប៉ុណ្ណោះ។ លោកថា ផលិតផលកសិកម្មកម្ពុជា ភាគច្រើនត្រូវបានដាំដុះនៅក្នុងតំបន់ជាប់ព្រំដែនថៃ ដូចជា នៅខេត្តបាត់ដំបង ប៉ៃលិន និងខេត្តបន្ទាយមានជ័យ។
លោក សូរស័ក្ត ថា៖ «ឥឡូវយើងពឹងផ្អែកទាំងស្រុងលើក្រុមហ៊ុនថៃ ក្នុងការដឹកជញ្ជូនទំនិញកសិផលពីកម្ពុជា ទៅប្រទេសទី៣ ដូច្នេះយើងចង់នាំចេញផលិតផលរបស់យើងទៅប្រទេសទី៣ ដោយក្រុមហ៊ុនកម្ពុជា ដោយគ្រាន់តែឆ្លងកាត់កំពង់ផែ ឡាំចាបាំង របស់ថៃ តែប៉ុណ្ណោះ»។
លោក ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាអភិវឌ្ឍន៍ជាតិ និយាយថា វានឹងផ្តល់អត្ថប្រយោជន៍ច្រើនដល់ខេត្តភាគខាងលិច និងខាងជើងប្រទេសកម្ពុជា រួមមានបន្ទាយមានជ័យ ពោធិ៍សាត់ បាត់ដំបង ដែលជាប់ព្រំដែននឹងប្រទេសថៃ បើសិនជា ប្រទេសថៃ ឲ្យផលិតផលកសិកម្មកម្ពុជា ឆ្លងកាត់កំពង់ផែឡាំចាបាំង។
លោក កល្យាណ ពន្យល់ថា៖ «វាគឺល្អ ប៉ុន្តែថា តើភាគីថៃ នឹងបើកឲ្យកម្ពុជា ឬយ៉ាងណា វាគឺផ្តល់អត្ថប្រយោជន៍ដល់ប្រទេសនីមួយៗ បើសិនជាយើងអាចភ្ជាប់បានវាល្អមែនទែន យើងអាចនាំចេញផលិតផលកសិកម្មចេញដោយចំណាយទាប»។
លោក សុង សារ៉ន ប្រធានក្រុមហ៊ុនអេមរុ រាយស៍កម្ពុជា បានប្រាប់ខ្មែរថាមស៍ នាពេលកន្លងទៅថា បើសិនជាប្រទេសថៃ យល់ព្រមអនុញ្ញាតឲ្យកសិផលកម្ពុជា ឆ្លងកាត់កំពង់ផែថៃ ការនាំចេញកសិផលកម្ពុជា នឹងកើនឡើង។ លោកថា ខេត្តភាគខាងជើង និងខាងលិចកម្ពុជា ពិតជាពិបាកក្នុងការដឹកជញ្ជូនទំនិញ ឬកសិផលពីតំបន់ផលិតមកកាន់កំពង់ផែព្រះសីហនុ ខណៈវាចំណាយលុយច្រើន និងពេលវេលា។
លោក សារ៉ន បន្ថែមថា៖ «យើងមិនទាន់មានផលិតផលកសិកម្មឆ្លងកាត់កំពង់ផែថៃ នៅឡើយទេ ពីព្រោះគេមិនអនុញ្ញាត ប៉ុន្តែបើសិនជា គេយល់ព្រម យើងនឹងធ្វើការនាំចេញ ពីព្រោះយើងមានរោងចក្រនៅខេត្តបាត់ដំបង ស្រាប់»។
បើយោងតាមរបាយការណ៍ប្រចាំឆ្នាំរបស់ក្រសួងពាណិជ្ជកម្ម ទំហំពាណិជ្ជកម្មទ្វេភាគីរវាងថៃ និងកម្ពុជា ក្នុងរយៈពេល ១០ខែមានចំនួន ៤,៤ប៊ីលានដុល្លារអាមេរិក ខណៈកម្ពុជា នាំចេញទៅកាន់ថៃ កើនឡើងដល់ ៨៥០លានដុល្លារ ចំណែកថៃ នាំចូលមកកម្ពុជា មានចំនួន ៣.៥៥ប៊ីលានដុល្លារអាមេរិក ក្នុងរយៈពេល ១០ខែ ឆ្នាំ២០១៦៕
Khmer Times
សុខ ចាន់់
No comments:
Post a Comment