ភ្នំពេញ: សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធាន គណបក្សប្រជាជនកម្ពុជា រួមទាំងតំណាងរាស្ត្រ របស់គណបក្សប្រជាជនកម្ពុជា នឹងអញ្ជើញចូលរួម ប្រជុំសភាវិសាមញ្ញ នៅព្រឹកថ្ងៃទី៣១ ខែមករា ឆ្នាំ២០១៧ ស្អែកនេះ ដើម្បីពិនិត្យ និងអនុម័តសេចក្តីស្នើវិសោធនកម្ម ជំពូក១២ថ្មី ប្រការ៤៨ថ្មី (បី) នៃបទបញ្ជាផ្ទៃក្នុងរដ្ឋសភា។ ចំណែកតំណាងរាស្ត្រ គណបក្សសង្គ្រោះ គេនៅមិនទាន់ដឹងថា ចូលរួមកិច្ចប្រជុំសភា ឬមិនចូលរួម នោះទេ។
ការប្រជុំវិសាមញ្ញសភា នៅថ្ងៃទី៣១ ខែមករា ស្អែកនេះ គឺដើម្បីបញ្ចប់តួនាទី លោក កឹម សុខា ប្រធានគណបក្សសង្គ្រោះជាតិ ពីប្រធានក្រុមមតិភាគតិច នៅក្នុងរដ្ឋសភា។
សម្តេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំប្រជុំ គណៈកម្មាធិការ អចិន្ត្រៃយ៍រដ្ឋសភា កាលពីព្រឹកថ្ងៃទី២៦ ខែមករា ឆ្នាំ២០១៧ ដើម្បីពិនិត្យលើសំណើសុំ កោះប្រជុំវិសាមញ្ញ ដើម្បីពិនិត្យ និងអនុម័តសេចក្តី ស្នើវិសោធនកម្ម ជំពូក១២ថ្មី ប្រការ៤៨ថ្មី (បី) នៃបទបញ្ជាផ្ទៃក្នុងរដ្ឋសភា ពិនិត្យលើសំណើ សុំបញ្ចូលក្នុងរបៀបវារៈ នៃសម័យប្រជុំ រដ្ឋសភាវិសាមញ្ញ នូវសេចក្តីស្នើវិសោធនកម្ម ជំពូក១២ថ្មី ប្រការ៤៨ថ្មី (បី) នៃបទបញ្ជា ផ្ទៃក្នុងរដ្ឋ សភា តាមសំណើរបស់គណៈកម្មការនីតិកម្ម និងយុត្តិធម៌ នៃរដ្ឋសភា។
ជាលទ្ធផល គណៈកម្មការធិការអចិន្ត្រៃយ៍ បានសម្រេចដាក់សំណើ របស់តំណាងរាស្ត្រ គណបក្សគណបក្សប្រជាជនកម្ពុជា ចំនួន៥២រូប តាមការស្នើរបស់ គណៈកម្មការនីតិកម្ម និងយុត្តិធម៌ ចូលសភាពេញអង្គ ជាវិសាមញ្ញ នៅថ្ងៃទី៣១ ខែមករា ឆ្នាំ២០១៧។
សេចក្តីប្រកាសព័ត៍មានរបស់ អគ្គលេខាធិការដ្ឋានរដ្ឋសភា កាលពីថ្ងៃទី២៦ ខែមករា បានឲ្យដឹងថា អង្គប្រជុំបានអនុម័តយល់ព្រម លើសំណើសុំកោះប្រជុំសភា ជាវិសាមញ្ញដើម្បីពិនិត្យ និងអនុម័តសេចក្តី ស្នើវិសោធនកម្ម ជំពូកទី១២ថ្មី ប្រការ៤៨ថ្មី (បី) នៃបទបញ្ជាផ្ទៃក្នុង នៃរដ្ឋសភា នៃព្រះរាជាណាចក្រកម្ពុជា។
អង្គប្រជុំ បានអនុម័តយល់ព្រម លើសំណើសុំបញ្ចូល ក្នុងរបៀបវារៈ នៃសម័យប្រជុំរដ្ឋសភា ជាវិសាមញ្ញនូវ សេចក្តីស្នើវិសោធនកម្ម ជំពូកទី១២ថ្មី ប្រការ៤៨ថ្មី (បី) នៃបទបញ្ជាផ្ទៃក្នុង នៃរដ្ឋសភា និងបានអនុម័តយល់ព្រម លើសមាសភាពលេខាធិការ ៣ រូប សម្រាប់សម័យប្រជុំ រដ្ឋសភាវិសាមញ្ញ នីតិកាលទី៥ មានៈ ១.លោក ហ៊ុន ម៉ានី ២.លោក ស សុខា និង៣.លោកជា ប៉ូច។
គណៈកម្មាធិការអចិន្ត្រៃយ៍ នៃរដ្ឋសភា បានអនុម័តយកកាលបរិច្ឆេទ សម្រាប់សម័យប្រជុំ រដ្ឋសភាជាវិសាមញ្ញ នីតិកាលទី៥ នៅព្រឹកថ្ងៃទី៣១ ខែមករា ឆ្នាំ២០១៧ វេលាម៉ោង ៨ ព្រឹក ដើម្បីពិភាក្សា និងអនុម័ត សេចក្តីស្នើវិសោធនកម្ម ជំពូកទី១២ថ្មី ប្រការ៤៨ថ្មី (បី) នៃបទបញ្ជាផ្ទៃក្នុងរដ្ឋសភា។
លោកហូរ វ៉ាន់ មន្ត្រីជាន់ខ្ពស់គណបក្សសង្គ្រោះជាតិ បានថ្លែងថា គណបក្សសង្គ្រោះជាតិ ចង់រក្សាទុកប្រការ ៤៨ថ្មី (បី) ពីព្រោះវាមានខ្លឹមសារល្អ និងមានអត្ថន័យថា និងជាយន្តការមួយ សម្រាប់គណបក្ស ដែលមានអាសនៈ នៅក្នុងរដ្ឋសភា អាចជជែកគ្នាបាន ដោយស្របច្បាប់ និងអាចសន្ទនាគ្នាបាន ទៅលើផលប្រយោជន៍ របស់ជាតិ ក៏ដូចជាផលប្រយោជន៍ របស់ប្រជាពលរដ្ឋ។
លោកបានបញ្ជាក់ថា “ខ្ញុំមានការសោកស្តាយ ខ្ញុំអត់ចង់ឲ្យធ្វើវិសោធនកម្ម ឬក៏លុបមាត្រា ៤៨ ហ្នឹងចោលទេ ហើយចម្លើយថា យើងត្រូវចូលប្រជុំ ឬក៏អត់ វាជាការលំបាក ក្នុងការមកប្រជុំ យើងចង់ទុក ហើយទៅនឹងទៅលុប ដូច្នេះអានឹង វាគ្រាន់តែមានការលំបាក យើងពិចារណា ក្នុងការមកប្រជុំនឹង យើងលំបាក ក្នុងការមកចូលរួមប្រជុំ”។
ចំណែកលោក ឈាង វុន មន្ត្រីជាន់ខ្ពស់ គណបក្សប្រជាជនកម្ពុជា បានថ្លែងប្រាប់អ្នកកាសែត បន្ទាប់ពីចប់កិច្ចប្រជុំថា គណៈកម្មការទី៦ យល់ថា ការស្នើរបស់ សមាជិកសភា ចំនួន៥២រូប ស្នើធ្វើវិសោធនកម្ម ជំពូក១២ថ្មី ប្រការ៤៨ថ្មី (បី) គឺមានហេតុមានផល។ ហើយយន្តការ ដែលសម្តេចនាយករដ្ឋមន្ត្រី ហ៊ុន សែន និងជានាយករដ្ឋមន្ត្រី ហ៊ុន សែន និងជាប្រធាន គណបក្សប្រជាជនកម្ពុជា បានស្នើឡើងឲ្យមានដំណើរការនេះ ដោយគណៈកម្មការទី៦ យល់ថា អនុវត្តទៅ វាអត់កើត ដោយសារមានការបំពានអំណាច ដោយសារការអនុវត្ត មិនស្មោះត្រង់ ។ល។ និង ។ល។ តាមសំណើរបស់តំណាងរាស្ត្រ គាត់ស្នើ គាត់ថា គាត់យល់ព្រមហើយ។
ទាក់ទងការធ្វើវិសោធនកម្ម ប្រការ៤៨ថ្មី (បី) ត្រូវបានលោកឈាង វុន ពន្យល់ថា កែទៅជា ៤៨ថ្មី (បួន) ដោយយកខ្លឹមសារទាំងស្រុង របស់ប្រការ ៤៨ ថ្មី (២) ដោយខ្លឹមសារប្រការ ៤៨ ថ្មី (២) វាក្យខណ្ឌចុងក្រោយ របស់ប្រការ ៤៨ ថ្មី (បី)។
សូមជម្រាបថា អគ្គលេខាធិការដ្ឋានរដ្ឋសភា បានទទួលលិខិតស្នើ របស់ក្រុមតំណាងរាស្ត្រ គណបក្សប្រជាជនកម្ពុជា ចំនួនជាង៥០រូប កាលពីថ្ងៃទី១៩ ខែមករា ឆ្នាំ២០១៧ ដោយលិខិតស្នើសុំនោះ បានចុះកាលបរិច្ឆេទថ្ងៃទី១៨ ខែមករា ឆ្នាំ២០១៧។
នៅក្នុងលិខិតស្នើសុំ របស់ក្រុមតំណាងរាស្ត្រ គណបក្សប្រជាជនកម្ពុជា គឺបានស្នើសុំ សម្តេចប្រធានរដ្ឋសភា ធ្វើវិសោធនកម្ម បទបញ្ជាផ្ទៃក្នុង រដ្ឋសភា ប្រការ៤៨ថ្មី (បី) និងស្នើសុំកោះប្រជុំវិសាមញ្ញ ដើម្បីអនុម័ត ការសុំធ្វើវិសោធនកម្ម។
មាត្រា៨២ ថ្មី ជំពូក៦ នៃបទបញ្ជាផ្ទៃក្នុង នៃរដ្ឋសភា បានចែងយ៉ាងថា “បទបញ្ជាផ្ទៃក្នុងនេះ នឹងកែប្រែបាន លុះត្រាតែមានសេចក្តីស្នើសុំពី តំណាងរាស្ត្រ មួយភាគ ៤ យ៉ាងតិច នៃចំនួនសមាជិក រដ្ឋសភាទាំងមូល ហើយត្រូវបានអនុម័ត យល់ព្រមដោយ សំឡេងភាគច្រើនដាច់ខាត នៃចំនួនសមាជិករដ្ឋសភាទាំងមូល”។
ទោះបីជាមិនមាន ការគាំទ្រដោយតំណាងរាស្ត្រ គណបក្សប្រឆាំង ទាំង៥៥រូប ក៏គណបក្សប្រជាជនកម្ពុជា ដែលមាន ៦៨ សំឡេង នៅក្នុងរដ្ឋសភា អាចកែប្រែច្បាប់ ស្តីពីបទបញ្ជាផ្ទៃក្នុង ដោយងាយ ដោយសារតែសំឡេង ភាគច្រើនដាច់ខាត ឬ ៥០បូកមួយ ត្រូវការសំឡេងតំណាងរាស្ត្រ ត្រឹមតែ ៦២ រូបប៉ុណ្ណោះ ចំណែកគណបក្សប្រជាជនកម្ពុជា មានសំឡេងនៅក្នុងសភា រហូតដល់ ៦៨រូប។
សូមរម្លឹកថា លោកកឹម សុខា ប្រធានស្តីទី គណបក្សសង្គ្រោះជាតិ បានធ្វើលិខិតទៅ អគ្គលេខាធិការដ្ឋានរដ្ឋសភា កាលពីថ្ងៃទី៥ ខែធ្នូ ឆ្នាំ២០១៦ ដើម្បីស្នើសុំផ្លាស់ប្តូរ សមាសភាព តំណែងប្រធានក្រុម តំណាងរាស្ត្រសម្លេងភាគតិច នៅក្នុងរដ្ឋសភា ដែលមានលោកសម រង្ស៊ី ជាប្រធាន។ ដោយការស្នើនេះ គឺលោកកឹម សុខា ដាក់រូបគាត់ ធ្វើជាប្រធានក្រុមតំណាងរាស្ត្រ សម្លេងភាគតិច នៅក្នុងរដ្ឋសភា ជំនួសលោក សម រង្ស៊ី វិញ៕
CEN
ដោយ: មុនីរាជ
No comments:
Post a Comment