ស្វាយរៀង៖ គណៈប្រតិភូនៃស្ថានទូតជប៉ុនប្រចាំកម្ពុជា រួមនឹង មន្ត្រីបច្ចេកទេសរបស់ក្រសួងធនធានទឹក និងឧតុនិយម សហការជាមួយមន្ទីរធនធានទឹក បាន អញ្ជើញ ចុះពិនិត្យប្រឡាយទំនប់នៅខេត្តព្រៃវែងនិងខេត្តស្វាយរៀង ដែលជាជំនួយឥតសំណងពីរដ្ឋាភិបាល និងប្រជាជនជប៉ុន។
យោងតាម ផេកផ្លូវការរបស់ ក្រសួងធនធានទឹក ដែលកាសែតកម្ពុជាទើបនឹងបានទទួល នៅថ្ងៃ ២៦ ខែមករា បានឲ្យដឹងថា បន្ទាប់ពីបានចុះពិនិត្យការងារនៅក្នុងខេត្តព្រៃវែងរួចមក នៅថ្ងៃទី ២៥ ខែមករា ឆ្នាំ ២០១៧ មន្ត្រីបច្ចេកទេសរបស់ក្រសួងធនធានទឹក និងឧតុនិយម សហការជាមួយមន្ទីរធនធានទឹក និងឧតុនិយមខេត្តស្វាយរៀង បានបន្តជូនដំណើរគណៈប្រតិភូនៃស្ថានទូតជប៉ុនប្រចាំកម្ពុជា ចុះពិនិត្យប្រឡាយទំនប់លោក ស្ថិតក្នុងឃុំបន្ទាយក្រាំង ស្រុកកំពង់រោទ៍ ខេត្តស្វាយរៀង ។
គួររំលឹកផងដែរថា ប្រឡាយទំនប់លោក ប្រវែង ១.៤២០ ម៉ែត្រ និងសំណង់ស្ទាក់ទឹក ០១ កន្លែង ត្រូវបានក្រសួងធនធានទឹក និងឧតុនិយម បើកការដ្ឋានដំណើរការសាងសង់ កាលពីដើមឆ្នាំ ២០១៦ ក្រោមជំនួយឥតសំណងពីរដ្ឋាភិបាល និងប្រជាជនជប៉ុន។ បន្ទាប់ពីបានបញ្ចប់ការដ្ឋានជាស្ថាពរនៅក្នុងខែមិថុនា ឆ្នាំ ២០១៦ ប្រឡាយទំនប់លោក បាន និងកំពុងដើរតួនាទីនាំទឹកពីព្រែកនៀលទៅបម្រើឲ្យការស្រោចស្រង់ដីស្រែរបស់បងប្អូនប្រជាកសិករប្រមាណ ៤៣៦ ហិកតា នៅក្នុងស្រុកកំពង់រោទ៍ ។
ដោយឡែកកាលពី ថ្ងៃទី ២៤ ខែមករា ឆ្នាំ ២០១៧ មន្ត្រីបច្ចេកទេសរបស់ក្រសួង និងមន្ទីរធនធានទឹក និងឧតុនិយមខេត្តព្រៃវែង បានជូនដំណើរមន្ត្រីនៃស្ថានទូតជប៉ុនប្រចាំកម្ពុជា ចុះពិនិត្យប្រឡាយរងស្តៅ ស្ថិតក្នុងឃុំក្រាំងស្វាយ ស្រុកព្រះស្តេច ខេត្តព្រៃវែង។ ប្រឡាយរងស្តៅ ត្រូវបានបើកការដ្ឋានដំណើរការសាងសង់កាលពី ដើមឆ្នាំ ២០១៦ និងបានបញ្ចប់ជាស្ថាពរ នៅក្នុងខែមិថុនា ឆ្នាំ២០១៦ ។ ក្រោមជំនួយឥតសំណងរបស់រដ្ឋាភិបាល និងប្រជាជនជប៉ុន ប្រឡាយរងស្តៅ មានប្រវែង ២.៣០០ ម៉ែត្រ មានតួនាទីជាប្រឡាយនាំទឹកពីសណ្តរទន្លេកំពង់ត្របែក និងអាចផ្តល់ទឹកសម្រាប់បម្រើឲ្យការស្រោចស្រពដីស្រែរបស់បងប្អូនប្រជាកសិករ បាន ៣ ដង ក្នុង ១ ឆ្នាំ លើផ្ទៃដី ចំនួន ៣០០ ហិកតា ៕
កម្ពុជាថ្មី
ឌួងវិរះជ័យ
No comments:
Post a Comment