ខេត្តស្វាយរៀង ៖ នាដើមឆ្នាំ២០១៧នេះ មន្ទីរសាធារណការ និងដឹកជញ្ជូនខេត្ត កំពុងមមាញឹកក្នុងការជួសជុលផ្លូវជាតិលេខ១ផង និងផ្លូវក្នុងខេត្តផង ដែលរងការខូចខាតជាច្រើនខ្សែដោយសារទឹកជំនន់ទឹកភ្លៀងកាលពីចុងឆ្នាំ២០១៦កន្លងទៅនេះ។ ក្រៅពីការងារជួសជុលផ្លូវខាងលើមានការងារជាច្រើនទៀត កំពុងខិតខំអនុវត្តតាមការណែនាំរបស់ក្រសួងសាធារណការ និងដឹកជញ្ជូន រួមមានសម្អាតដើមឈើ ដែលដុះសងខាងផ្លូវជាតិ និងផ្លូវក្នុងខេត្តជួសជុលលាបបង្គោលគីឡូម៉ែ្រត ព្រមទាំងប៉ះចិញ្ជើមផ្លូវផងដែរ។
លោក សំ សាវុធ ប្រធានមន្ទីរសាធារណការ និងជញ្ជូនខេត្តបានឲ្យដឹងកាលពីរសៀលថ្ងៃទី២៧ ខែមករា ឆ្នាំ២០១៧នេះថា ការងារជួសជុលក្នុងសប្តាហ៍ទីបី ខែមករា ឆ្នាំ២០១៧នេះ ខាងមន្ទីរសាធារណការ និងដឹកជញ្ជូនសម្រេចបានរួមមាន ១.បានបញ្ចប់ការងារជួសជុលកំណាត់ផ្លូវខេត្តលេខ៣១៥ ដោយក្រាលកៅស៊ូDBSTប្រវែង៥.៧០០ម៉ែត្រ។ ២.បានបញ្ចប់ការងារជួសជុលកំណាត់ផ្លូវខេត្តលេខ៣១៥ ដោយក្រាលក្រួសក្រហមប្រវែង៦.៣០០ម៉ែត្រ។ ៣.លើកំណាត់ផ្លូវជាតិលេខ១: បានកាប់សម្អាតរុក្ខជាតិសងខាងផ្លូវជួសជុលលាបបង្គោលគីឡូម៉ែត្រប៉ះចិញ្ចើមផ្លូវ កៀរចិញ្ចើមផ្លូវ និងបានស្រោចកៅស៊ូស្រទាប់ទី១ ត្រង់កន្លែងកាត់ជួសជុល(ចន្លោះPK១២៥+០០០ ដល់PK១៤៩+១៦០)។
លោកបានបន្តថា ចាប់តាំងពីក្រសួងសាធារណការ និងដឹកជញ្ជូនបានផ្ដល់ឲ្យម៉ូតូកង់បីចំនួន២គ្រឿង និងសម្ភារៈមួយកំប្លេសម្រាប់ជួសជុលផ្លូវសំបុកមាន់នោះ ក្រោយបានទទួលហើយកម្មករជំនាញចុះជួសជុលជាប្រចាំតាមបណ្ដោយផ្លូវជាតិលេខ១ផង តាមផ្លូវក្នុងខេត្តដើម្បីឲ្យប្រជាពលរដ្ឋដឹកកសិផលមកកាន់ទីផ្សារបានងាយស្រួលធ្វើដំណើរផង ព្រមទាំងអាចកាត់បន្ថយបាននូវគ្រោះថ្នាក់ចរាចរណ៍បាន១កម្រិតផងដែរ៕
កម្ពុជាថ្មី
គឹម សេង
No comments:
Post a Comment