ការដឹកនាំប្រទេសបែបផ្តាច់ការរបស់លោកប្រធានាធិបតីកូរ៉េខាងជើង គីម ជុងអ៊ុន អាចនឹងធ្វើឲ្យរបបដឹកនាំ និងប្រព័ន្ធនយោបាយនៃប្រទសឯកោមួយនេះ ត្រូវប្រឈមចលនាបះបោរ។ នេះបើយោងតាមការអះអាងរបស់អតីតមន្ត្រីការទូតជាន់ខ្ពស់កូរ៉េខាងជើង ដែលរត់គេចពីកណ្តាប់ដៃនៃការគ្រប់គ្រងដោយលោក គីម ជុងអ៊ុន ហើយមកចុះចូលនៅក្នុងប្រទេសកូរ៉េខាងត្បូងវិញ។
លោក Thae Yong Ho អតីតភារធារីកូរ៉េខាងជើងប្រចាំក្រុងឡុងដ៍នៃប្រទេសអង់គ្លេស បាននិយាយក្នុងកិច្ចសម្ភាសន៍ជាមួយនឹងសារព័ត៌មាន CNN ថា បើលោក គីម ជុងអ៊ុន នៅបន្តកាន់អំណាច ពិភពលោក នឹងមិនមានឱកាសដើម្បីធ្វើឲ្យបញ្ហាសិទ្ធិមនុស្សកូរ៉េខាងជើងល្អប្រសើរនោះទេ ជាពិសេសនោះ កម្មវិធីនុយក្លេអ៊ែរ ក៏កាន់តែមិនអាចបញ្ឈប់បានទៀត។ សម្រាប់លោកភារធារី មធ្យោបាយតែមួយគត់ដើម្បីផ្លាស់ប្តូរកូរ៉េខាងជើង គឺមានតែការផ្លាស់ប្តូរមេដឹកនាំ។
លោក Thae បានឲ្យដឹងពីចរិកលក្ខណៈរបស់លោក គីម ជុងអ៊ុន យ៉ាងដូច្នេះថា៖« ប្រសិនបើលោក គីម ជុងអ៊ុន សម្រេចថាសម្លាប់អ្នកណា, ប្រសិនបើ លោក គិតថាជាអ្នកណាម្នាក់គឺជាការគំរាមកំហែង ឬធ្វើឲ្យលោក ភ័យខ្លាច លោក នឹងកម្ចាត់អ្នកនោះភ្លាម។ នេះហើយ គឺជាបច្ចុប្បន្នភាពពិតប្រាកដរបស់កូរ៉េខាងជើង»។ លោក អះអាងថា នឹងមានប្រជាជនកូរ៉េខាងជើងច្រើនទៀត នឹងរត់គេចពីកូរ៉េខាងជើង។
សូមសម្រាបផងដែរថា លោក Thae Yong Ho គឺជាអតីតមន្ត្រីការទូតលំដាប់ទីពីរនៃស្ថានទូតកូរ៉េខាងជើងប្រចាំប្រទេសអង់គ្លេស។ លោក បោះបង់សិទ្ធិរស់នៅពីប្រទេសកូរ៉េខាងជើង ដោយលោក បានចាកចេញ និងគេចខ្លួនពីប្រទេសអង់គ្លេសដើម្បីចុះចូល និងសុំសិទ្ធិរស់នៅក្នុងប្រទេសកូរ៉េខាងត្បូងជាមួយនឹងក្រុមគ្រួសាររបស់លោក ដ្បិតលោក មិនចង់រស់នៅក្នុងរបបដឹកនាំដ៏គ្រោះថ្នាក់ និងផ្តាច់ការដែលកំពុងតែដឹកនាំដោយលោកប្រធានាធិបតី គីម ជុងអ៊ុន។ លោក ទទួលបានការការពារពីរដ្ឋាភិបាលកូរ៉េខាងត្បូង។
នៅក្នុងកិច្ចសម្ភាសន៍ដដែលនោះ លោក Thae បានពន្យល់ពីមូលហេតុ ដែលលោកត្រូវរត់គេចមករស់នៅក្នុងប្រទេសកូរ៉េខាងត្បូងយ៉ាងដូច្នេះថា៖«ការរត់គេចខ្លួន គឺជារឿងមួយដ៏ជូរចត់នៃឆាកជីវិតរបស់ខ្ញុំ។ វាគឺជាដ៏អាក្រក់បំផុតសម្រាប់លោក ក្នុងការចំណាយពេល៥០ឆ្នាំរបស់លោកនៅលើវិថីមួយដែលមិនដឹងទិសដៅ ហើយ ខ្ញុំ ត្រូវបំភ្លេចអតីតកាលរបស់ខ្ញុំ»។
អតីតមន្ត្រីការទូតជាន់ខ្ពស់រូបនេះ ក៏លើកឡើងភាពដឹកនាំផ្តាច់ការមួយរបស់មេដឹកនាំកូរ៉េខាងជើងក្នុងការគ្រប់គ្រង់មន្ត្រីការទូតដែលបំពេញការងារបេសកម្មក្រៅប្រទេស។ លោក បានអះអាងថា លោក គឺជាមន្ត្រីការទូតដែលសំណាងបំផុតហើយដែលលោក អាចនាំទាំងភរិយា និងកូនរបស់លោកទៅរស់នៅក្នុងពេលបំពេញបេសកម្មនៅក្នុងប្រទេសអង់គ្លេសនោះ។ លោក បន្ថែមថា រឿងបែបនេះ មិនអាចកើតឡើងចំពោះមន្ត្រីការទូតផ្សេងទៀតឡើយ។
លោកអតីតភារធារី បានពន្យល់ថា ការណ៍ដែលរបបព្យុងយ៉ាងធ្វើបែបនេះដើម្បីធានាថាមន្ត្រីការទូតទាំងនោះ នឹងមិនអាចក្បត់ ឬរត់ចេញពីកូរ៉េខាងជើងបានឡើយ ដ្បិត ពួកគេត្រូវត្រូវត្រលប់មករស់នៅជាមួយនឹងក្រុមគ្រួសារនៅព្យុងយ៉ាងវិញ។ លោក Thae បានសង្កត់ធ្ងន់ថា៖«កូន ត្រូវបានប្រើប្រាស់ជាចំណាប់ខ្មាំងដោយលោក គីម ជុងអ៊ុន»៕
ថ្មីៗ
អត្ថបទ : ថ្មីៗ
No comments:
Post a Comment