កំពង់ឆ្នាំង ៖ បដិមាព្រះកែវ១អង្គ ដែលកសាងឡើងដោយកែវមរកតដ៏ល្អវិចិត្រធ្លាប់គង់នៅក្នុងទីក្រុងលង្វែកពីសម័យបុរាណ ដែលត្រូវបានគេលួចយកទៅប្រទេសថៃនោះ នៅព្រឹកថ្ងៃទី២៦ ខែមករា ឆ្នាំ២០១៧ ត្រូវបានលោកជំទាវបណ្ឌិត សៀង ច័ន្ទហេង ប្រធានក្រុមហ៊ុនហេងអភិវឌ្ឍន៍ ជាវក្នុងតម្លៃដ៏ខ្ពស់ពីប្រទេសថៃ និងធ្វើបុណ្យប្រពៃណីតាមគន្លងព្រះពុទ្ធសាសនា ដង្ហែយកមកតម្កល់ទុកក្នុងវត្តត្រឡែងកែង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ដែលជាទីក្រុងពីបុរាណទុកគោរពបូជាវិញ។
លោកជំទាវបណ្ឌិត សៀង ច័ន្ទហេង នៅក្នុងពិធីនេះ បានមានប្រសាសន៍ឲ្យដឹងថា ៖ នៅពេលលោកជំទាវ ទៅរកស៊ីនៅប្រទេសថៃ បានឃើញគេដាក់តាំងតួអង្គព្រះកែវ ដែលធ្វើអំពីព្រះកែវមរកតជារបស់បុព្វបុរសខ្មែរគោរពបូជាតាំងពីបុរាណ លោកជំទាវបានលួចសុំជាវពីជនជាតិថៃយ៉ាងសម្ងាត់ ដើម្បីយាងដង្ហែព្រះអង្គមកគង់នៅក្នុងទឹកដីខ្មែរសុំសេចក្តីសុខសប្បាយវិញដូចពីដើម។ ក្រោយពីជាវបានលោកជំទាវបានទាក់ទងសុំច្បាប់ពីប្រទេសថៃ និងប្រទេសខ្មែរដើម្បីដង្ហែព្រះអង្គមកប្រទេសកម្ពុជាវិញ តែអាជ្ញាធរថៃ និងខ្មែរមិនអនុញ្ញាតឡើយ។ បន្ទាប់មកលោកជំទាវ បានទុកព្រះអង្គនៅក្នុងប្រទេសថៃរយៈពេល៣ខែទៀត។
ក្រោយពីសុំច្បាប់គេដង្ហែព្រះអង្គកែវមកប្រទេសខ្មែរមិនបាន លោកជំទាវគ្មានវិធីអ្វីក្រៅពីបន្លំដឹកព្រះអង្គតាមទំនិញឡើយ ហើយលោកជំទាវបានអុជធូបបួងសួងថា បើព្រះកែវពិតជាមានបុណ្យបារមីពិតប្រាកដមែន សូមឲ្យព្រះអង្គបានឆ្លងផុតព្រំដែនដោយសុវត្ថិភាព ដើម្បីបានមកគង់នៅក្នុងមាតុប្រទេសវិញ។
ដឹងអីថា ក្រោយមកព្រះអង្គកែវបានយាងមកតាមរថយន្តដឹកអីវ៉ាន់មកដល់ផ្ទះលោកជំទាវ ដោយគ្មានអ្នកណាមួយដឹងជាមុនឡើយ សូម្បីតែអ្នកបើករថយន្តដឹកអីវ៉ាន់ក៏មិនបានដឹងថា ព្រះអង្គកែវបានយាងមកតាមរថយន្តគាត់ដែរ នេះហើយគឺជាបុណ្យបារមីដ៏ពូកែសក្ដិសិទ្ធិរបស់ព្រះអង្គកែវ ចង់មកគង់នៅក្នុងទឹកដីប្រទេសកម្ពុជាវិញ។
លោក ឈឹម វុឌ្ឍា អភិបាលស្រុកកំពង់ត្រឡាច បានថ្លែងនៅក្នុងពិធីបុណ្យនេះថា ៖ ក្នុងនាមលោកជាអាជ្ញាធរស្រុក តំណាងឲ្យប្រជាពលរដ្ឋទាំងអស់ សូមថ្លែងអំណរគុណយ៉ាងជ្រាលជ្រៅ ចំពោះលោកជំទាវបណ្ឌិត សៀង ច័ន្ទហេង ដែលក្នុងនាមលោកជំទាវជាពុទ្ធសាសនិកកាន់ព្រះពុទ្ធសាសនា លោកជំទាវ មានមនសិការជាតិយ៉ាងជ្រាលជ្រៅ បានលះបង់ធនធានដ៏មានតម្លៃនាំយក ព្រះកែវមរកត ពីប្រទេសថៃធ្វើបុណ្យដង្ហែយកមកតម្កល់ទុកជូនប្រជាពលរដ្ឋខ្មែរគោរពបូជា នៅក្នុងវត្តត្រឡែងកែង ដែលជាកន្លែងទីក្រុងលង្វែកពីសម័យបុរាណវិញ ដើម្បីឲ្យប្រជារាស្ត្រខ្មែរបានសុខសប្បាយតរៀងទៅ។
ដោយឡែកនៅក្នុងព្រឹកថ្ងៃទី២៦ ខែមករា នេះដែរ លោកជំទាវ សៀង ច័ន្ទហេង គណៈកម្មការវត្ត ព្រះសង្ឃ ប្រជាពលរដ្ឋនៅក្នុងមូលដ្ឋាន សមត្ថកិច្ច អាជ្ញាធរស្រុក និងលោកអភិបាលរងខេត្ត ក៏បានចូលរួមប្រារព្ធពិធីក្រុងពាលី បញ្ចុះបឋមសិលា កសាងឈាបនដ្ឋាន មួយកន្លែងនៅក្នុងវត្តត្រឡែងកែងទុកជូនប្រជាពលរដ្ឋប្រើប្រាស់ ដែលជាអំណោយរបស់លោកជំទាវ សៀង ច័ន្ទហេង ផងដែរ។
នៅក្នុងពេលនោះដែរ លោកជំទាវ ក៏បានប្រកាសឲ្យដឹងថា ៖ លោកជំទាវ នឹងជួយជួសជុលដំបូលព្រះវិហារវត្តត្រែងកែវឲ្យបានថ្មីឡើងវិញ និងជួយជួសជុលផ្លូវមួយខ្សែនៅខាងជើងវត្តឲ្យបានល្អស្អាតឡើងវិញផងដែរ នៅក្នុងឆ្នាំ២០១៧នេះ។
អាជ្ញាធរខេត្តកំពង់ឆ្នាំង និងប្រជាពលរដ្ឋទាំងអស់ សូមថ្លែងអំណរគុណយ៉ាងជ្រាលជ្រៅចំពោះលោកជំទាវប្រធានក្រុមហ៊ុនហេងអភិវឌ្ឍន៍ និងសូមបួងសួងដល់វត្ថុសក្ដិសិទ្ធិ តាមជួយថែរក្សាការពារ និងជួយចម្រុងចម្រើន ឲ្យក្រុមហេងអភិវឌ្ឍន៍រកស៊ីកាន់តែមានបានបន្ថែមទៀតរហូតតរៀងទៅ៕
កម្ពុជាថ្មី
ឈាង ថារិទ្ធ
No comments:
Post a Comment