ភ្នំពេញ៖ រដ្ឋសភាបានសម្រេចយកករណីឯកឧត្តម កឹម សុខា នេះដាក់បញ្ជូលក្នុងកិច្ចប្រជុំសភាពេញអង្គ ដើម្បីពិនិត្យនិងអនុម័តលើប្រការ៤៨ ថ្មី(បី) ដែលនិយាយពីតួនាទីឯកឧត្តម កឹម សុខា នៅថ្ងៃទី៣១ មករា។
អ្នកនាំពាក្យគណបក្សប្រជាជនកម្ពុជានៅក្នុងរដ្ឋសភាលោក ឈាង វុន បាននិយាយថា ការសម្រេចធ្វើវិសោធនកម្មបទបញ្ជាផ្ទៃក្នុងរដ្ឋសភា លើប្រការ៤៨ថ្មី (បី) នេះគឺដោយសារតែប្រធានស្តីទីគណបក្សសង្គ្រោះជាតិ ឯកឧត្តម កឹម សុខា មិនមានភាពស្មោះត្រង់ក្នុងការប្រើប្រាស់តួនាទីខ្លួនក្នុងរដ្ឋសភា។ លោក ឈាង វុន បានបញ្ជាក់ដូច្នេះថា៖«ការដកប្រការនោះចេញ ព្រោះគណបក្សសង្គ្រោះជាតិ ចេះតែបង្ខំឲ្យគណបក្សប្រជាជន ឲ្យដោះលែងអ្នកទោសតាមការចរចា នៃការប្រើឋានៈស្មើនាយករដ្ឋមន្ត្រីខ្លួននេះ»។ លោក ឈាង វុន លើកឡើងក្រោយបញ្ចប់កិច្ចប្រជុំគណៈកម្មការអចិន្ត្រៃយ៍ ដើម្បីលុបតំណែងប្រធានមតិភាគតិចរបស់ ឯកឧត្តម កឹម សុខា នៅក្នុងរដ្ឋសភានៅថ្ងៃចន្ទ ទី២៣ ខែមករានេះ។
ជុំវិញបញ្ហានេះអ្នកនាំពាក្យគណបក្សសង្គ្រោះជាតិលោក យ៉ែម បុញ្ញឫទ្ធិ យល់ឃើញថា ការលុបតំណែង ប្រធានក្រុមមតិភាគតិច និងប្រធានក្រុមតំណាងរាស្ត្ររបស់ឯកឧត្តម កឹម សុខា នេះ មិនមែនជាដំណោះស្រាយសមរម្យនោះទេ ពោលគឺវាធ្វើ់ឲ្យការចរចារកដំណោះស្រាយរវាងគណបក្សទាំងពីរ ត្រឡប់មកដើរថយក្រោយទៅវិញ។
វិសោធនកម្មនេះ ធ្វើឡើងមួយសប្តាហ៍ប៉ុណ្ណោះក្រោយពី សម្តេច ហ៊ុន សែន នាយករដ្ឋមន្ត្រី និងជាប្រធានបក្សកាន់អំណាច បានបង្ហាញបំណងលុបចោលតំណែងជាប្រធានក្រុមមតិភាគតិច និងប្រធានក្រុមតំណាងរាស្ត្ររបស់ឯកឧត្តម កឹម សុខា។ ជាតំណែងដែលអនុប្រធានគណបក្សសង្គ្រោះជាតិរូបនេះ ទើបទទួលបានក្រោយការលើកលែងទោសពីព្រះមហាក្សត្រកាលពីដើមខែធ្នូកន្លងទៅ៕
ថ្មីៗ
អត្ថបទ : ថ្មីៗ
No comments:
Post a Comment