ភ្នំពេញ៖ អតីតតារាសំដែង ថៃ នរៈពិទូ បានសារភាពប្រាប់សមត្ថកិច្ចថា ម្ចាស់ក្លិបកម្សាន្តស្តាឡៃ ដែលជាមន្ត្រីយោធានៅផ្នែកសឹករងខេត្តបាត់ដំបង មានជាប់ពាក់ព័ន្ធនិងការចែកចាយថ្នាំញៀន។ ចម្លើយសារភាពរបស់អតីតតារាសម្តែង ត្រូវបានផ្សាយនៅក្នុងគេហទំព័រព័ត៌មានអគ្គស្នងការដ្ឋាននគរបាលជាតិនាថ្ងៃទី២១ខែមករា។
សំណុំរឿងបង្ក្រាបការជួញដូរគ្រឿងញៀនដែលមានពាក់ព័ន្ធអតីតតារាសម្តែង ថៃ នរៈពិទូ នោះ ឥឡូវនេះបានរាលដាលដល់មន្ត្រីយោធាមួយរូបទៀតនៅក្នុងខេត្តបាត់ដំបង។ នេះបើយោងតាមអត្ថបទព័ត៌មានមួយដែលចុះផ្សាយដោយគេហទំព័រនៃអគ្គស្នងការនគរបាលជាតិ ដែលបញ្ជាក់ឲ្យដឹងផងដែរថា មន្ត្រីយោធាផ្នែកសឹករងនោះ ជាម្ចាស់ក្លិបកម្សាន្តឈ្មោះ ស្តាឡៃ។
គេហទំព័រអគ្គស្នងការនគរបាលជាតិដដែលបញ្ជាក់ថា ការរកឃើញបណ្តាញជួញដូរគ្រឿងញឿនបន្ថែមទៀត កើតឡើងក្រោយពីមានចម្លើយរបស់អតីតតារាសម្តែង ថៃ នរៈពិទូ និងការស្រាវជ្រាវបន្ថែមរបស់សមត្ថកិច្ច។
កាលពីថ្ងៃទី៩ ខែមករា សមត្ថកិច្ចស្នងការដ្ឋាននគរបាលខេត្តបាត់ដំបង ដោយសហការជាមួយនឹងកម្លាំងជំនាញ បានបង្ក្រាបខារ៉ាអូខេមួយកន្លែង យីហោ ដឹសោន ហ្វាមីលី ខេធីវី ដោយបានរកឃើញមានការជួញដូរគ្រឿងញៀននៅក្នុងខារ៉ាអូខេនោះ។ មនុស្ស៦នាក់ត្រូវបានឃាត់ខ្លួន ដែលក្នុងនោះក៏មានម្ចាស់ទីតាំងកម្សាន្ត និងអតីតតារាសម្តែង ថៃ នរៈពិទូផងដែរ។
គេហទំព័រខាងលើ បានសរសេរពន្យល់បន្តថា នៅមុនពេលប្រតិបត្តិការរបស់សមត្ថកិច្ចនៅហាងខារ៉ាអូខេនោះ ថៅកែក្លិបកម្សាន្តស្តាឡៃ បានមកកាន់ទីតាំងខាងលើនេះដែរ ដើម្បីយកថ្នាំញៀនប្រភេទកាហ្វេ ពី ថៃ នរៈពិទូ យកទៅចែកចាយក្នុងក្លិបកម្សាន្តរបស់ខ្លួន ដោយមួយកញ្ចប់មានតម្លៃចាប់ពី៧០ដុល្លារដល់២៥០ដុល្លារ៕
ថ្មីៗ
អត្ថបទ : រ៉ឹម ភារី
No comments:
Post a Comment