គ្រាន់តែប្រធានាធិបតី ដូណាល់ ត្រាំ ចូលធ្វើការមិនបានប៉ុន្មានថ្ងៃផង សម្ព័ន្ធមិត្តអាមេរិកអ៊ីស្រាអែល ចាប់ផ្តើមអនុញ្ញាតឲ្យមានការសាងសង់គម្រោងលំនៅដ្ឋានថ្មី ចំនួន ២៥០០ ខ្នងនៅទឹកដី West Bank នៅថ្ងៃអង្គារទី ២៤មករា។ ការសម្រេចនេះធ្វើឡើង ក្រោយពេលដែលប្រទេសនេះអនុញ្ញាតឲ្យមានការបន្តគម្រោងសាងសង់លំនៅដ្ឋានច្រើនជាង ៥០០ខ្នងនៅលើទឹកដី ហ្ស៊េរុយសាឡិមខាងកើត។ អ៊ីស្រាអែលកំពុងជាន់ឈ្លីច្បាប់អន្តរជាតិជាពិសេសដំណោះស្រាយអង្គការសហប្រជាជាតិដែលត្រូវបានអនុម័តកាលពីខែធ្នូកន្លងទៅនេះដែរ។ ប្រកាន់ជំហរផ្ទុយពីអាមេរិក អង្គការសហប្រជាជាតិ និងសហភាពអឺរ៉ុបរួមដៃគ្នាថ្កោលទោសអ៊ីស្រាអែល។
សូមស្តាប់ការបកស្រាយរបស់លោក សៅ ផលនិស្ស័យ៖
រដ្ឋាភិបាលអ៊ីស្រាអែល បានសម្រេចអនុម័តគម្រោងថ្មីទៀតដែលសំដៅដល់ការសង់សំណង់លំនៅដ្ឋាន ២៥០០ខ្នងនៅលើទឹកដី West Bank ។ យោងតាមសារព័ត៌មាន Al Jazeera រដ្ឋមន្ត្រីការពារជាតិអ៊ីស្រាអែលលោក Avigdor Lieberman បានបញ្ជាក់ថា គម្រោងសាង់សង់លំនៅដ្ឋាននៅក្នុងទឹកដី West Bank នេះធ្វើឡើងដើម្បីឆ្លើយតបកង្វះខាតលំនៅដ្ឋានរបស់ប្រជាជនអ៊ីស្រាអែលនៅក្នុងតំបន់ប៉ុណ្ណោះ។
គម្រោងសាងសង់លំនៅដ្ឋានរាប់ពាន់ខ្នងនេះធ្វើឡើងពីរថ្ងៃប៉ុណ្ណោះក្រោយពេលដែលរដ្ឋាភិបាលអ៊ីស្រាអែលព្រមអនុញ្ញាតឲ្យមានការសាងសង់ផ្ទះសម្បែងច្រើនជាង ៥០០ ខ្នងនៅក្នុងទឹកដីហ្ស៊េរុយសាឡិមខាងកើតដែលខ្លួនកាន់កាប់ដោយខុសច្បាប់នោះ។ ហើយវាក៏កើតឡើងបន្ទាប់ពីប្រធានាធិបតី ដូណាល់ ត្រាំ ក្លាយជាប្រធានាធិបតីអាមេរិកទី ៤៥ ជាផ្លូវការ។
១.បានរដ្ឋបាល ត្រាំ ជាខ្នងបង្អែក អ៊ីស្រាអែលជាន់ឈ្លីច្បាប់អន្តរជាតិគ្មានខ្លាចរអា
ការអនុញ្ញាតឲ្យមានរៀបចំសង់លំនៅដ្ឋានរាប់ពាន់ខ្នងនៅលើទឹកដី West Bank និង ហ្ស៊េរុយសាឡិម ជាសកម្មភាពមួយផ្គើនសហគមន៍អន្តរជាតិ ហើយវាក៏ជាការរំលោភជាន់ឈ្លីច្បាប់អន្តរជាតិដែលមានជាធរមានដែរ។ នាយករដ្ឋមន្ត្រីអ៊ីស្រាអែល ណេតាន់ យ៉ាហ៊ូ បានសរសេរបង្ហោះតាមប្រព័ន្ធទំនាក់ទំនងសង្គម Twitter របស់ខ្លួនថា រដ្ឋាភិបាលអ៊ីស្រាអែលនឹងបន្តសាងសង់លំនៅដ្ឋាននេះទៀត។
យោងតាមដំណោះស្រាយក្រុមប្រឹក្សាសន្តិសុខអង្គការសហប្រជាជាតិ អ៊ីស្រាអែលត្រូវបញ្ឈប់ឲ្យអស់រាល់សកម្មភាពសង់លំនៅដ្ឋាននៅលើដីប៉ាឡេស្ទីននេះ ដែលវាជាវិធានការមួយដែលធានាថា ដំណើការចរចាសន្តិភាពរវាងអ៊ីស្រាអែលនិងប៉ាឡេស្ទីនមិនត្រូវបានបំផ្លិចបំផ្លាញទេនោះ។
អ៊ីស្រាអែលហាក់បីដូចជាមិនខ្លាចរអាច្បាប់អន្តរជាតិនិងបទដ្ឋានអន្តរជាតិដែលគ្រប់គ្នាគោរពឡើយ។ ប៉ុន្តែ វាក៏ដោយសាររដ្ឋអ៊ីស្រាអែលនេះឡើងចាងដោយសារតែមានដូណាល់ត្រាំ ជាខ្នងបង្អែកនៅពេលបច្ចុប្បន្ន។
ខុសពីលោក បារ៉ាក់ អូបាម៉ា លោក ដូណាល់ ត្រាំ ក្លាយជាប្រធានាធិបតីដែលគាំទ្ររដ្ឋជីហ្វអ៊ីស្រាអែលដ៏ខ្លាំងក្លាមួយ ហើយលោកបានទូរសព្ទទៅនាយករដ្ឋមន្ត្រីអ៊ីស្រាអែលនិងអញ្ជើញមេដឹកនាំរូបនេះមកបំពេញទស្សនកិច្ចផ្លូវការនៅអាមេរិកនៅខែកុម្ភៈថែមទៀត។ លោកបានរៀបរាប់ថា អាមេរិកនៅតែមានជំហរការពារប្រយោជន៍អ៊ីស្រាអែល និង បន្តជួយជ្រោមជ្រែងការស្វែងរកសន្តិភាពរវាងអ៊ីស្រាអែលនិងប៉ាឡេស្ទីននៅពេលខាងមុខ។
សូមបញ្ជាក់ថា ក្រុមប្រឹក្សាសន្តិសុខបានសម្រេចអនុម័តដំណោះស្រាយមួយថ្កោលទោសសំណង់លំនៅដ្ឋានអ៊ីស្រាអែលកាលពីចុងខែធ្នូកន្លងទៅ ហើយសហរដ្ឋអាមេរិកក្រោមរដ្ឋបាល លោក បារ៉ាក់ អូបាម៉ា នៅឡើយនោះមិនបានប្រើប្រាស់សិទ្ធិជំទាស់ដំណោះស្រាយនេះដើម្បីផ្គាប់ចិត្តអ៊ីស្រាអែលឡើយ។ ដូណាល់ ត្រាំ បានទិតៀនលោក បារ៉ាក់ អូបាម៉ា ចាស់ដៃ ហើយលោកចាត់ទុកដំណោះស្រាយក្រុមប្រឹក្សាសន្តិសុខនេះបទបញ្ញត្តិដែលមានចរិកប្រឆាំងអ៊ីស្រាអែល ទៀត។
ប្រធានាធិបតីអាមេរិករូបនេះ ក៏ហ៊ានសន្យាថា រដ្ឋបាលលោក នឹងផ្លាស់ប្តូរទីតាំងស្ថានទូតអាមេរិកពីក្រុង Tel Aviv ទៅកាន់ទីក្រុងហ្ស៊េរុយសាឡិម ដែលវាជាការទទួលស្គាល់ភាពស្របច្បាប់នៃការកាន់កាប់ទឹកដីប៉ាឡេស្ទីនដោយអ៊ីស្រាអែល។ ប៉ុន្តែ ការទទួលស្គាល់ទឹកដី ហ្ស៊េរុយសាឡិមជាផ្នែកមួយរបស់អ៊ីស្រាអែលស្របច្បាប់ ជាការព្យាយាមបំផ្លាញផ្លូវឆ្ពោះទៅរកសន្តិសុភាពរវាងអ៊ីស្រាអែលនិងប៉ាឡេស្ទីនទៅវិញទេ។
ត្រឡប់មកវិញ ពាក់ព័ន្ធបញ្ហាសំណង់ផ្ទះអ៊ីស្រាអែលនេះ អង្គការសហប្រជាជាតិនិងអឺរ៉ុប មិនរណបអាមរិកឡើយ ហើយបានរួមគ្នាថ្កោលទោសរដ្ឋាភិបាលអ៊ីស្រាអែល។ អ្នកនាំពាក្យអគ្គលេខាធិការសហប្រជាជាតិ Antonio Guterres លោក Stephane Dujarric បានលើកឡើងដូច្នេះថា៖ «សកម្មភាពឯកតោភាគីក្លាយជាឧបសគ្គសម្រាប់ការអនុវត្តដំណោះស្រាយរដ្ឋពីរ ហើយវាជាក្តីកង្វល់ធំបំផុតរបស់លោក អគ្គលេខាធិការអង្គការសហប្រជាជាតិ។ សម្រាប់លោកផ្ទាល់ វាគ្មានផែនការបន្ទាប់ទេ សម្រាប់ដំណោះស្រាយរដ្ឋពីរនេះ»។
២.ប៉ាឡេស្ទីនបានត្រឹមថ្កោលទោសអ៊ីស្រាអែល
ស្របពេលអ៊ីស្រាអែលបន្តរំលោភបំពានច្បាប់អន្តរជាតិមិនញរញើត អាជ្ញាធរប៉ាឡេស្ទីន បានត្រឹមតែថ្កោលទោសអ៊ីស្រាអែលប៉ុណ្ណោះ។ អ្នកនាំពាក្យប្រធានាធិបតីប៉ាឡេស្ទីន Nabil Abu Rdeneh បានសង្កត់ធ្ងន់ថា អ្វីដែលអ៊ីស្រាអែលកំពុងធ្វើជាការបំផ្លាញឆន្ទៈកសាងសន្តិភាពរវាងប៉ាឡេស្ទីន និងអ៊ីស្រាអែល។ លោកបន្តថាអ៊ីស្រាអែលកំពុងប្រឆាំងចំណាត់ការសហគមន៍អន្តរជាតិ និងពិភពលោកទាំងមូល ហើយលោកទទូចសុំឲ្យសហគមន៍អន្តរជាតិឈប់ធ្វើគធ្វើថ្លង់ចំពោះបញ្ហានេះទៀត។
យ៉ាងណាមិញ ក្រៅពីរងគ្រោះដោយសារសំណង់លំនៅដ្ឋាន ប្រជាជនប៉ាឡេស្ទីន បច្ចុប្បន្នប្រឈមបញ្ហាច្រើន ដូចបានបញ្ជាក់ខាងដើម រួមមានទាំង គម្រោងប្តូរស្ថានទូតរបស់រដ្ឋបាលលោកដូណាល់ ត្រាំ ផងនោះ។ បើសិនជាមានការប្តូរស្ថានទូតតាមការលើកឡើងរបស់ ដូណាល់ ត្រាំ មែន វានឹងក្លាយជារឿងអយុត្តិធម៌បំផុតសម្រាប់ ប៉ាឡេស្ទីន។
ពាក់ព័ន្ធការប្តូរទីតាំងស្ថានទូតអាមេរិកនេះ កាលពីពាក់កណ្តាលខែមករា លោក Mahmoud Abbas បានផ្ញើលិខិតទៅលោក ដូណាល់ ត្រាំ ហើយលោកបានឆ្លៀតព្រមានថា ការឈានទៅប្តូរទីតាំងស្ថានទូតនោះនឹងមានផលអាក្រក់និងគ្រោះថ្នាក់ខ្លាំង។ វាបំផ្លាញដំណោះស្រាយរដ្ឋពីរ និងរារាំងដំណើរការកសាងសន្តិភាព, សន្តិសុខ និងស្ថិរភាពនៅក្នុងតំបន់ផង។
ក្រៅពីបញ្ជូនលិខិតទៅលោក ដូណាល់ ត្រាំ លោក Mahmoud Abbas ក៏បានផ្ញើលិខិតទៅកាន់មេដឹកនាំរុស្ស៊ី, ចិន និងសហភាពអឺរ៉ុបផងដែរដោយលោកអំពាវនាវឲ្យមេដឹកនាំពិភពលោកទាំងនោះរារាំងអាមេរិកកុំឲ្យប្តូរទីតាំងស្ថានទូតនេះ។
ក្រៅពីភាពពិសិដ្ឋ ហ្ស៊េរុយសាឡិមជាទីក្រុងមួយដ៏ចម្រូងចម្រាសដែលគេមិនទាន់កំណត់ដាច់ស្រេចថាជារបស់ភាគីណា ទោះជាវាស្ថិតក្រោមការកាន់កាប់របស់អ៊ីស្រាអែលក៏ដោយ។ ហើយវាក៏ជាចំណុចស្នូលនៃការចរចាសន្តិភាពរវាងអ៊ីស្រាអែលនិងប៉ាឡេស្ទីនដែរ។
តាមពិតទៅ អ៊ីស្រាអែល បានវាយដណ្តើមកាន់កាប់តំបន់នៅភាគខាងកើតហ្ស៊េរុយសាឡិមនៅក្នុងសង្គ្រាម ៦ថ្ងៃ រវាងរដ្ឋអារ៉ាប់-អ៊ីស្រាអែលនៅក្នុងឆ្នាំ ១៩៦៧។ ហើយអាជ្ញាធរអ៊ីស្រាអែលក៏បានភ្ជាប់ទឹកដីនេះនិងដាក់បញ្ចូលក្នុងឧបសម្ព័ន្ធរបស់ខ្លួនដោយបង្រួបបង្រួមទីក្រុងហ្ស៊េរុយសាឡិមទាំងមូលជាផ្លូវការក្នុងឆ្នាំ ១៩៨០ តែម្តង។ ចាប់ពីពេលនោះមក ទឹកដី ហ្ស៊េរុយសាឡិមស្ថិតក្រោមការកាន់កាប់របស់អ៊ីស្រាអែល៕
ថ្មីៗ
អត្ថបទ : ថ្មីៗ
No comments:
Post a Comment