 |
| លោក នី ចរិយា(ធ្វេង)លោក យី សុខសាន្ត(កណ្តាល)និងលោក នី សុខា |
អង្គការសហប្រជាជាតិទទួលបន្ទុកផ្នែកសិទ្ធិមនុស្ស បានអំពាវនាវដល់រដ្ឋាភិបាលកម្ពុជាជាថ្មីទៀត ឲ្យដោះលែងជាបន្ទាន់ដល់មន្ត្រីអាដហុកនិង គ.ជ.ប ខណៈគម្រោងចរចាផ្នែកនយោបាយដែលគេរំពឹងថា នឹងឈានទៅដោះស្រាយបញ្ហាទាំងនោះ ត្រូវបានគណបក្សកាន់អំណាចលុបចោល។
អស់រយៈពេលជិត១ឆ្នាំហើយ ដែលមន្ត្រីសិទ្ធិមនុស្សអាដហុកមានលោក ណៃ វ៉ង់ដា លោក យី សុខសាន្ត លោក នី សុខា លោកស្រី លឹម មុនី និងមន្ត្រី គ.ជ.ប លោក នី ចរិយា ត្រូវបានសាលាដំបូងរាជធានីភ្នំពេញសម្រេចឲ្យឃុំខ្លួនបណ្តោះសន្នទាក់ទងនឹងបទចោទសូកប៉ាន់សាក្សី ក្នុងសំណុំរឿងនាង ខុម ចាន់តារ៉ាទី ហៅស្រីមុំ ដែលត្រូវបានគេទម្លាយថាជាស្រីកំណាន់របស់លោក កឹម សុខា។
ក្នុងសេចក្តីប្រកាសព័ត៌មានចុះថ្ងៃទី២៥ មករា ឆ្នាំ២០១៧ ឧត្តមស្នងការសហប្រជាជាតិទទួលបន្ទុកសិទ្ធិមនុស្សដែលមានទីស្នាក់ការនាទីក្រុងហ្ស៊ឺណែវ ប្រទេសស្វីសបានស្នើដល់រដ្ឋាភិបាលឲ្យពន្យល់ពីមូលដ្ឋានច្បាប់ចំពោះការឃុំខ្លួនអ្នកទាំងប្រាំនាក់នោះ និងបានជម្រុញឲ្យមានការដោះលែងអ្នកទាំងនោះ ដោយថាកម្ពុជាកំពុងតែរំលោភសិទ្ធិមនុស្សក្នុងប្រទេសរបស់ខ្លួន។
ក្នុងសេចក្តីប្រកាសព័ត៌មាននោះបានដកស្រង់សំដីរបស់អ្នកទទួលបន្ទុកសិទ្ធិមនុស្សនៃឧត្តមស្នងការសិទ្ធិមនុស្សកម្ពុជាលោកស្រី រ៉ូណាល់ ស្មីត ថាកម្ពុជាកំពុងតែបំពានទៅលើកត្តិការសញ្ញាអន្តរជាតិស្តីសិទ្ធិពលរដ្ឋនិងនយោបាយដែលខ្លួនបានចុះហត្ថលេខា ហើយថាវាល្មមដល់ពេលគ្រប់គ្រាន់ហើយដែលត្រូវដោះលែងអ្នកទាំងនោះ។
លោកស្រី ស្មីត និយាយថា៖ «អ្នកទាំង៥រូបនោះត្រូវបានចាប់ចំណាប់ខ្មាំងយូរគ្រប់គ្រាន់ហើយ វាដល់ពេលវេលាដោះលែងពួកគេហើយ។ … ដរាបណាការតវ៉ាក្នុងយុទ្ធនាការថ្ងៃចន្ទពណ៌ខ្មៅនៅតែត្រូវបានហាមឃាត់ ក្រុមអ្នកតវ៉ាត្រូវបានគេចាប់ខ្លួន និងផ្តន្ទាទោស ហើយការគំរាមកំហែងប្រឆាំងនឹងពួកគេមិនទាន់ទទួលយកបាននោះ ការអះអាងណាមួយដែលថាកម្ពុជាគោរពសិទ្ធិមនុស្ស នឹងត្រូវបានគេមើលឃើញថាជាការអាម៉ាស់យ៉ាងខ្លាំង»។
វីអូឌីមិនអាចសុំការឆ្លើយតបពីប្រធានគណកម្មាការសិទ្ធិមនុស្សកម្ពុជាលោក កែវ រ៉េមី បាននៅឡើយទេនៅព្រឹកថ្ងៃទី២៦ មករានេះ ដោយទូរសព្ទចូលតែគ្មានអ្នកទទួល។
អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី បានផ្តល់បទសម្ភាសន៍ជាមួយវីអូឌីកាលពីពេលថ្មីៗនេះថាការនៅតែបន្តឃុំខ្លួនមន្ត្រីសិទ្ធិមនុស្សនិងអគ្គលេខាធិការរង គ.ជ.ប នេះវាជាការដែលធ្វើឲ្យមានបញ្ហាមិនចេះចប់និងធ្វើឲ្យប៉ះពាល់ដល់ប្រជាប្រិយភាពបក្សប្រជាជននិងរដ្ឋាភិបាលកម្ពុជាទាំងក្នុងនិងក្រៅស្រុកកាន់តែខ្លាំងឡើងផងដែរ។
លោកមានប្រសាសន៍ថា៖ «តាមខ្ញុំមើលទៅ ការបន្តការឃុំឃាំងនេះ វាធ្វើឲ្យស្ថានភាពនយោបាយទាំងក្នុងស្រុក និងក្រៅស្រុកកាន់តែអាក្រក់ថែមទៀត។ ខ្ញុំមិនដឹងថារដ្ឋាភិបាលនៅឱបដុំភ្លើងមួយដុំហ្នឹងទុកធ្វើអីទៀត។ បើយើងមើលទោសទណ្ឌអីទៅ ក៏វាមិនត្រូវជាប់យូរបែបហ្នឹងទេ បើយើងប្រៀបធៀបជាមួយនឹងថ្លៃខ្សាច់ប៉ុន្មានរយលានដុល្លារ ដែលមិនមាននរណាខ្វល់ខ្វាយ ហើយតាមអ្វីដែលលេចនូវសំឡេងឆ្លើយឆ្លើយគ្នារវាងថ្នាក់ដឹកនាំខ្មែរជាន់ខ្ពស់ទាក់ទងនឹងលុយរាប់លានដុល្លារទៀត ក៏គ្មាននរណាខ្វល់ខ្វាយលូកដៃទៅស្រាវជ្រាវរកលុយហ្នឹងឲ្យឃើញមក ហើយទុកការឃុំខ្លួនមន្ត្រីសិទ្ធិមនុស្សនិង គ.ជ.ប. ហ្នឹងឲ្យនៅត្រាំត្រែងវេទនា»។
លោក មាស នី បន្ថែមថាបក្សកាន់អំណាចគួរតែពិចារណាដោះស្រាយបញ្ហាទាំងនេះឲ្យចប់ ហើយងាកមកធ្វើផ្តោតបញ្ហាជាតិវិញ មិនគួរទុករឿងនេះនាំឲ្យខ្លួនរងឈ្មោះអាក្រក់នោះទេ។
កាលពីថ្ងៃអង្គារ ទី២៤ មករាកន្លងទៅ ក្រុមគ្រួសារអ្នកជាប់ឃុំទាំង៥នាក់នោះក៏បានទៅដាក់ញ្ញាត្តិនៅខុទ្ទការល័យព្រះមហាក្សត្រនិងទីស្តីការគណៈរដ្ឋមន្ត្រីផងដែរ ដើម្បីស្នើសុំឲ្យមានការដោះលែងអ្នកទាំងនោះឲ្យមានសេរីភាពវិញ ដោយថាការអូសបន្លាយឃុំខ្លួនអ្នកទាំង៥ទាំងរកមិនឃើញកំហុសនេះ វាជាភាពអយុត្តិធម៌ធ្លាក់មកលើអ្នកការពារសិទ្ធិមនុស្ស។
គួរបញ្ជាក់ផងដែរក្តីសង្ឃឹមក្នុងការមានការដោះលែងអ្នកទាំង៥នាក់នេះត្រូវបានបានលោក ស ខេង បង្ហើបម្តងកាលពីចុងឆ្នាំ២០១៦។ ពេលនោះលោកថាអាចនឹងមានការចរចាជាមូយបក្សប្រឆាំងក្នុងការសម្របសម្រួលដោះលែងអ្នកទាំងនោះ តែនៅពេលថ្មីនេះលោក ហ៊ុន សែន បានប្រកាសពីក្រៅប្រទេសវិញថាខ្លួនលែងចង់មានការចរចាជាមួយបក្សប្រឆាំងទៀតហើយ។ លោក ហ៊ុន សែន អះអាងថាបក្សប្រឆាំងតែងតែប៉ុនប៉ងប្រើប្រាស់ការចរចានេះដើម្បីដោះលែងមនុស្សមួយចំនួន ដែលលោក ហ៊ុន សែន ថាជាការបំពានដល់អំណាចតុលាការ៕
VOD
ដោយ លោក ហ៊ុន សិរីវឌ្ឍន៍
No comments:
Post a Comment