ស្ថានទូតអាមេរិកប្រចាំកម្ពុជា នៅថ្ងៃទី២៦ មករា បានច្រាលចោលព័ត៌មានដែលថា អាមេរិក បានផ្លាស់ប្តូរគោលនយោបាយទិដ្ឋាការសម្រាប់តំបន់អាស៊ី។ សេចក្តីថ្លែងការណ៍នេះ ធ្វើឡើងបន្ទាប់ពីមានពីបណ្តាញសង្គម និងសារព័ត៌មានក្នុងតំបន់មួយចំនួនបានបន្តផ្សព្វផ្សាយ និងចែករំលែកពីព័ត៌មានដែលថាប្រធានាធិបតីអាមេរិកថ្មី លោក ដូណាល់ ត្រាំ បានចុះហត្ថលេខាលើលិខិតបង្គាប់ប្រតិបត្តិដោយអនុញ្ញាតឲ្យប្រជាជនអាស៊ីអាចធ្វើដំណើរទៅកាន់អាមេរិកដោយមិនចាំបាច់សុំទិដ្ឋាការ។
«សូមមានការប្រុងប្រយ័ត្នពីព័ត៌មានក្លែងក្លាយ។ មិនមានការផ្លាស់ប្តូរនៃគោលនយោបាយទិដ្ឋាការរបស់សហរដ្ឋអាមេរិកសម្រាប់អ្នកធ្វើដំណើរពីតំបន់អាស៊ី ឬតំបន់ផ្សេងទៀតឡើយ។ មិនមែនជាការពិតឡើយ»។ នេះគឺជាការឆ្លើយតបរបស់ស្ថានភាពអាមេរិកតាមរយៈគណនីផ្លូវការ Twitter ទៅនឹងសារព័ត៌មាន Breaking News ដែលបានសរសេរអត្ថបទមួយក្រោមចំណងជើងថា «ដូណាល់ ត្រាំ ចុះហត្ថលេខាលើគោលនយោបាយមិនយកទិដ្ឋាការធ្វើដំណើរសម្រាប់អាស៊ី»។
Beware of #Fakenews. There have been NO changes to U.S. visa policy for travelers from Asia or elsewhere. Untrue: https://t.co/GtfvtESKlK
— US Embassy Cambodia (@USEmbPhnomPenh) January 26, 2017
ក្នុងខ្លឹមសារនៃអត្ថបទដដែលនោះ បាននិយាយដែរថា បទបញ្ជាថ្មី ដែលជាការផ្លាស់ប្តូរគោលនយោបាយទិដ្ឋាការសម្រាប់ការធ្វើដំណើររបស់ប្រជាជនអាស៊ីទៅកាន់អាមេរិកនោះ នឹងអនុញ្ញាតឲ្យពលរដ្ឋអាស៊ីអាចស្នាក់នៅក្នុងទឹកដីអាមេរិកក្នុងរយៈពេលអតិបរមា១៨០ថ្ងៃក្នុងគោលដៅទេសចរណ៍ ឬធុរកិច្ចដោយមិនចាំបាច់មានទិដ្ឋាការ។ ក៏ប៉ុន្តែប្រសិនការស្នាក់នៅទីនោះលើសពី១៨០ថ្ងៃ តម្រូវឲ្យមានទិដ្ឋាការ។
មិនខុសពីស្ថានទូតអាមេរិកប្រចាំកម្ពុជា នៅថ្ងៃដដែលនោះ ស្ថានទូតអាមេរិកប្រចាំម៉ាឡេស៊ី ក៏បានចេញសេចក្តីថ្លែងការណ៍បដិសេធព័ត៌មាននេះផងដែរ។ ស្ថានទូត បានបញ្ជាក់យ៉ាងដូច្នេះថា៖« ព័ត៌មាន បានអះអាងថា ប្រធានាធិបតី ត្រាំ បានចុះហត្ថលេខាលើលិខិតបង្គាប់ប្រតិបត្តិដោយអនុញ្ញាតឲ្យពលរដ្ឋអាស៊ីធ្វើដំណើរទៅកាន់អាមេរិកដោយមិនចាំបាច់សុំទិដ្ឋាការ។ ព័ត៌មាននេះ ក្លែងក្លាយ និងគ្មានប្រភពត្រឹមត្រូវឡើយ»៕
ថ្មីៗ
អត្ថបទ : ទេព អ៊ីវិសាល
No comments:
Post a Comment