ស្ទឹងត្រែង: ស្ទឹងត្រែង វារីអគ្គិសនីសេសានក្រោម២ ដែលមានអនុភាពតម្លើង ៤០០ មេហ្គាវ៉ាត់ នឹងដាក់ឲ្យដំណើរការ ជាលើកដំបូងរបស់ខ្លួន នាដើមឆ្នាំ២០១៨ ហើយថាមពលផលិត ១.៩១២ លានគីឡូវ៉ាត់ម៉ោង។ ជាមធ្យមក្នុង១ឆ្នាំ ថ្លៃអគ្គិសនីលក់ឲ្យអគ្គិសនីកម្ពុជាថេរ ៦,៩៥ សេនអាមេរិក ក្នុង ១ គីឡូវ៉ាត់ម៉ោង ក្នុងរយៈពេល ៤០ ឆ្នាំ ដោយមានទំហំវិនិយោគ របស់ក្រុមហ៊ុន ចំនួនបី ចំនួន ៧៨១,៥២ លានដុល្លារអាមេរិក។ ក្រោយពីដំណើរការ រយៈពេល៤០ឆ្នាំ គម្រោងទំនប់វារីអគ្គិសនីនេះ នឹងត្រូវប្រគល់ជូនរដ្ឋាភិបាល ជាអ្នកគ្រប់គ្រងទាំងស្រុង។នេះបើតាមការផ្សព្វផ្សាយ របស់អាជ្ញាធរអគ្គិសនីកម្ពុជា កាលពីថ្ងៃទី២៣ ខែមករា ឆ្នាំ២០១៧។
បើតាមប្រភពដដែល បានបន្តថា ក្រុមហ៊ុនវារីអគ្គិសនី សេសានក្រោម២ ស្ថិតក្នុងឃុំភ្លុក ស្រុកសេសាន ខេត្តស្ទឹងត្រែង បានចាប់ផ្តើម ទប់ទឹកទំនប់ ជាលើកដំបូងហើយ បន្ទាប់ពីក្រុមហ៊ុនមួយនេះ សាងសង់អស់រយៈពេល ជាច្រើនឆ្នាំ និងជិតរួចរាល់ជាស្ថាពរ។
អ្នកជំនាញសាងសង់ បានប្រាប់ឱ្យដឹងថា ការសាងសង់ទំនប់ សេសានក្រោម២ បានចាប់ផ្តើម កាលពីខែមករា ឆ្នាំ២០១៣ មក នៅពេលនេះ សម្រេចបានស្ទើរទាំងស្រុងហើយ ដូចជាទំនប់ដី ទាំងផ្នែកសងខាង សាងសង់បាន ៨៧,៣ ភាគរយ។ ទំនប់បង្ហៀរទឹក សម្រេចបាន ការសាងសង់ ៩៩,៩ ភាគរយ។ ទំនប់ផលិតថាមពលអគ្គិសនី សម្រេចបាន ការសាងសង់ ៩៨,៩ភាគរយ។ ទំនប់បេតុង សម្រេចបានការសាងសង់ ៩៩,៨ ភាគរយ និងទួទំនប់ ទាំងមូលសម្រេចបាន ៨៨,២៥ ភាគរយ។
អាជ្ញាធរអគ្គិសនីកម្ពុជា បានបន្តថា វារីអគ្គិសនីនេះ មានផ្ទៃរងទឹកភ្លៀង ផ្តល់ប្រភពទឹកឲ្យ មានទំហំសរុប ៤៩.២០០ គីឡូម៉ែត្រការ៉េ ដែល ២ ភាគ ៣ ឋិតនៅលើខ្ពង់រាប នៃប្រទេសវៀតណាម ដែលជាប្រភពទឹក នៃទន្លេសេសាន និងទន្លេស្រែពក រួចនៅទីនោះ រដ្ឋាភិបាលប្រទេសវៀតណាម បានសាងសង់ ទំនប់វារីអគ្គិសនី ចំនួន ១១ កន្លែងរួចហើយ គឺ ៧ កន្លែង នៅលើទន្លេសេសាន និង ៤ កន្លែង នៅលើទន្លេស្រែពក ដូច្នេះប្រភពទឹកមួយផ្នែកធំ របស់ទន្លេទាំង២ ត្រូវបានទំនប់ទាំង ១១ កន្លែងខាងលើ ទប់ទុករួចហើយ ធ្វើឲ្យវារីអគ្គិសនី សេសានក្រោម ២ របស់កម្ពុជា មិនចាំបាច់បង្កើតអាងស្តុកទឹកធំ ដែលលិចផ្ទៃដីច្រើនពេកទេ គឺដូច្នេះហើយអាងវារីអគ្គិសនី សេសានក្រោម ២ នេះ បានគ្រោងកម្ពស់ទឹក ក្នុងអាងប្រែប្រួលត្រឹមតែ ១ ម៉ែត្រប៉ុណ្ណោះគឺពី ៧៤ម៉ែត្រ ទៅ ៧៥ម៉ែត្រ ។ ការគ្រោងដូច្នេះ នឹងផ្តល់នូវផលប្រយោជន៍ ដែលអាចបំបាត់នូវបញ្ហាឡើងកម្ពស់ទឹកគំហុក ដែលធ្លាប់មានកន្លងមក ដោយសារវៀតណាម បើកទ្វារទឹកស្ថានីយវារីអគ្គិសនី របស់គេម្តងៗ និងសម្រួលដល់ ការធ្វើចរាចរណ៍ផ្លូវទឹក ព្រមទាំងការប្រើប្រាស់ទឹក នៅតំបន់ជុំវិញអាងទឹកផងដែរ ។
ទំនប់វារីអគ្គិសនី សេសានក្រោម២ នៅខេត្តស្ទឹងត្រែង គឺជាទំនប់ដែលធំជាងគេ ក្នុងប្រទេសកម្ពុជា មានកម្លាំងអនុភាពរហូតដល់ ទៅ៤០០មេហ្គាវ៉ាត់ម៉ោង ។ វារីអគ្គិសនីសេសានក្រោម២ គឺជាការវិនិយោគរួមគ្នា ដោយក្រមហ៊ុនវិនិយោគ មកពីប្រទេសចិន Hydrolancang International Energy មានភាគហ៊ុន ៥១ ភាគរយ។ ក្រុមហ៊ុននៅកម្ពុជា គឺក្រុមហ៊ុន Royal Group របស់អ្នកឧកញ៉ាគិត ម៉េង មានភាគហ៊ុន ៣៩ ភាគរយ និងក្រុមហ៊ុន EVN មកពីប្រទេសវៀតណាម មានភាគហ៊ុន ១០ ភាគរយ សរុបទឹកប្រាក់វិនិយោគទុន ជិត៨០០លានដុល្លារ។
ចំណែកផ្ទៃដីសំអាតបាតអាង មានទំហំ៣ម៉ឺន៦ពាន់ហិកតា និងមានកម្ពស់ទំនប់ សរុប៨០ម៉ែត្រ ក្នុងនោះកម្ពស់៧៥ម៉ែត្រ គឺជាកម្ពស់សម្រាប់ទប់ទឹក។ ដោយឡែក កម្ពស់៥ម៉ែត្រទៀត សម្រាប់ការពារហានិភ័យ ពីកម្រិតកម្ពស់ទឹកខ្ពស់ ដែលយូរៗ ហូរជ្រុល កើតមានម្តងម្កាលនៃទំនប់។
គេអាចនឹងឱ្យដំណើរការ នៅទួប៊ីនទី១ នៅចុងឆ្នាំ២០១៧ មានកម្លាំងថាមពល ប្រហែលជា ៥០ មេហ្គាវ៉ាត់ម៉ោង និងចុងឆ្នាំ២០១៨ ទួប៊ីន សរុបទាំង៨ នៃវារីអគ្គិសនី អាចដំណើរការពេញលេញ ប្រើថាមពលសរុប ៤០០ មេហ្គាវ៉ាត់ម៉ោង។
ទំនប់វារីអគ្គិសនីសេសានក្រោម២ ក្រោយពីដំណើរការរួចរាល់ អាចនឹងផ្តល់ប្រាក់ចំណូលពន្ធ ដល់រាជរដ្ឋាភិបាល បានប្រមាណ ៣០ លានដុល្លារ ក្នុង១ឆ្នាំៗ។ យោងតាមកិច្ចព្រមព្រៀង រវាងក្រុមហ៊ុនវិនិយោគ និងរាជរដ្ឋាភិបាល បន្ទាប់ពីដំណើរការ រយៈពេល៤០ឆ្នាំ គម្រោងទំនប់វារីអគ្គិសនីសេសានក្រោម២ នឹងត្រូវជូនរដ្ឋាភិបាល ជាអ្នកគ្រប់គ្រង៕
CEN
ដោយ: ដាវុធ
No comments:
Post a Comment