 |
| ការដ្ឋានសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង។ រូបថតថ្ងៃទី២៦ ខែមីនា ឆ្នាំ២០១៦ RFA/Chuop Sereyroth |
ប្រជាពលរដ្ឋប្រមាណ ៦០គ្រួសារដែលយល់ព្រមទទួលយកសំណងផលប៉ះពាល់ពីគម្រោងសាងសង់ទំនប់វារីអគ្គិសនីសេសានក្រោមពីរ នៅខេត្តស្ទឹងត្រែង មិនទាន់ទទួលសំណងជាផ្ទះ និងដីស្រែចម្ការសម្រាប់រស់នៅបង្កបង្កើនផលនៅឡើយ ខណៈពួកគាត់នឹងត្រូវជម្លៀសពីភូមិចាស់ទៅទីតាំងថ្មី។ អ្នកភូមិជំរុញឲ្យក្រុមហ៊ុន ពន្លឿនសាងសង់ផ្ទះ និងផ្តល់ដីស្រែចម្ការសម្រាប់ការជម្លៀសចេញនេះឲ្យបានឆាប់រហ័ស។
តំណាងក្រុមហ៊ុនសាងសង់ទំនប់វារីអគ្គិសនីសេសានក្រោមពីរ នៅស្រុកសេសាន ខេត្តស្ទឹងត្រែង អះអាងនៅថ្ងៃទី២ ខែកុម្ភៈ នេះថា នឹងរៀបចំសាងសង់ផ្ទះ និងឈូសឆាយដីស្រែចម្ការផ្តល់ជាសំណងជូនពលរដ្ឋឲ្យបានរួចរាល់មុនរដូវធ្លាក់ភ្លៀងឆ្នាំ២០១៧។
ការអះអាងនេះ ធ្វើឡើងបន្ទាប់ពីអាជ្ញាធរឃុំស្រែគរ ដាក់សំណើសុំអន្តរាគមន៍ពីរដ្ឋមន្ត្រីក្រសួងឧស្សាហកម្ម និងសិប្បកម្ម ជំរុញឲ្យក្រុមហ៊ុនសាងសង់ផ្ទះ និងផ្តល់ដីស្រែចម្ការជូនប្រជាពលរដ្ឋដែលកំពុងត្រៀមទៅរស់នៅភូមិថ្មី។
តំណាងក្រុមហ៊ុន លោក អ៊ុំ ប៊ុនរេត បញ្ជាក់នៅថ្ងៃទី២ ខែកុម្ភៈ នេះថា ដោយសារប្រជាពលរដ្ឋមួយចំនួនទើបសម្រេចចិត្តទទួលយកសំណងនៅរដូវវស្សាមុននេះ ហេតុនេះការសាងសង់ផ្ទះ និងឈូសឆាយដីសម្រាប់ស្រែចម្ការពលរដ្ឋ មិនអាចធ្វើបានតាមតម្រូវការនៅឡើយ។ លោកសន្យាថា ចាប់ពីពេលបច្ចុប្បន្នរហូតដល់ជិតរដូវធ្លាក់ភ្លៀង ផ្ទះនឹងត្រូវសាងសង់រួចរាល់ ចំណែកដីស្រែចម្ការបានឈូសឆាយរួចហើយ កំពុងត្រៀមបែងចែកជូនប្រជាពលរដ្ឋ៖ «ឥឡូវជាក់ស្តែងយើងធ្វើហើយតើ! នៅតែភ្ជួរទេ ហើយនិងបែងចែកឡូ និងធ្វើផ្លូវ។ យើងឈូសព្រៃហើយទាល់តែធ្វើផ្លូវចូលទៅដីកសិកម្មហ្នឹង បានយើងភ្ជួរដីហ្នឹងបាន។ ការងារហ្នឹងកំពុងធ្វើរាល់ថ្ងៃ មមាញឹកណាស់ពីឥឡូវរហូតដល់ខែវស្សា នៅសល់បួនប្រាំខែទៀត។ អ៊ីចឹងធ្វើទាន់ហើយ»។
ក្រុមការងារសិទ្ធិមនុស្ស ចុះពិនិត្យស្ថានភាពពលរដ្ឋដែលទទួលសំណងផលប៉ះពាល់ពីគម្រោងសាងសង់ទំនប់វារីអគ្គិសនីសេសានក្រោម២ នៅភូមិស្រែស្រណុក ឃុំក្បាលរមាស ស្រុកសេសាន ខែត្រស្ទឹងត្រែង ថ្ងៃទី១៤ ខែធ្នូ ឆ្នាំ២០១៦។ RFA/Men Sothyr RFA/Men Sothyr
អាជ្ញាធរឃុំស្រែគរ ឲ្យដឹងថា ប្រជាពលរដ្ឋជាង ៤៧០គ្រួសារក្នុងចំណោមប្រជាពលរដ្ឋសរុបជាង ៥៥០គ្រួសារ យល់ព្រមទទួលសំណងផលប៉ះពាល់ ក៏ប៉ុន្តែរហូតមកទល់ពេលនេះមានប្រជាពលរដ្ឋប្រមាណ ៦០គ្រួសារមិនទាន់ទទួលបានសំណងនោះនៅឡើយ។
មេឃុំស្រែគរ លោក សៀក មេគង្គ មានប្រសាសន៍ថា អាជ្ញាធរបានអន្តរាគមន៍ជូនអាជ្ញាធរខេត្ត និងតំណាងក្រុមហ៊ុនពាក់ព័ន្ធករណីនេះហើយ ក៏ប៉ុន្តែដំណោះស្រាយហាក់នៅយឺតនៅឡើយ។ លោកបន្តថា ប្រជាពលរដ្ឋបារម្ភខ្លាចការអូសបន្លាយពេលវេលាធ្វើឲ្យពួកគាត់ខកខានធ្វើស្រែចម្ការនៅរដូវធ្លាក់ភ្លៀងឆ្នាំ២០១៧ នេះ៖ «ក្នុងនាមអាជ្ញាធរយើងប្រឈមបញ្ហាហ្នឹងជាងគេ ទាក់ទងការយឺតយ៉ាវមិនទាន់ដោះស្រាយ ៦០ករណីហ្នឹង។ ចំណុចខ្សោយរបស់ក្រុមហ៊ុន គឺអាហ្នឹងខ្សោយជាងគេ»។
រដ្ឋមន្ត្រីក្រសួងឧស្សាហកម្ម និងសិប្បកម្ម លោក ស៊ុយ សែម កាលពីថ្ងៃទី២៤ ខែមករា ក្នុងឱកាសជួបសំណេះសំណាលជាមួយប្រជាពលរដ្ឋឃុំស្រែគរ បានជំរុញឲ្យក្រុមហ៊ុនប្រញាប់សាងសង់ផ្ទះ និងឈូសឆាយដីប្រគល់ជូនប្រជាពលរដ្ឋដែលគ្រោងទៅរស់នៅភូមិថ្មី ឲ្យបានរួសរាន់។ លើសពីនោះ លោកក៏បានជំរុញឲ្យក្រុមហ៊ុនសាងសង់ផ្ទះឈើសម្រាប់ប្រជាពលរដ្ឋនៅសេសសល់ជាង ៩០គ្រួសារ ដែលមិនទាន់យល់ព្រមទទួលសំណងនោះដែរ។
ទំនប់វារីអគ្គិសនីសេសានក្រោមពីរ ជាគម្រោងខ្នាតធំទីមួយនៅប្រទេសកម្ពុជា ដែលត្រូវចំណាយប្រាក់ជាង ៨ពាន់លានដុល្លារ។ គម្រោងនេះ បង្កផលប៉ះពាល់ប្រជាពលរដ្ឋជាង ១ពាន់គ្រួសារនៅភូមិចំនួន៧ ក្នុងឃុំចំនួន៤។ បច្ចុប្បន្ន ប្រជាពលរដ្ឋនៅឃុំស្រែគរ ជាង ៩០គ្រួសារ និងឃុំក្បាលរមាស ជាង ៣០គ្រួសារ មិនទាន់យល់ព្រមទទួលសំណងនៅឡើយ។ មកទល់នឹងថ្ងៃទី២ ខែកុម្ភៈ នេះ ទំនប់សាងសង់រួចរាល់ប្រមាណ ៩០% ហើយ។ តាមការគ្រោងទុក ទំនប់នឹងត្រូវបិទទឹកនៅខែមិថុនា ខាងមុខនេះ៕
RFA
ដោយ រដ្ឋា វិសាល
No comments:
Post a Comment