ភ្នំពេញ៖ ស្នងការរាជធានីភ្នំពេញ លោក ជួន សុវណ្ណ បញ្ជាក់ថា កម្លាំងសមត្ថកិច្ចនៅតែអាចគ្រប់គ្រងតំបន់ ចែកចាយ និងប្រើប្រាស់គ្រឿងញៀនត្រពាំងឈូក ទោះបីជាតំបន់ដែលមានសកម្មភាពគ្រឿងញៀន លេចធ្លោក្នុងរាជធានីភ្នំពេញមួយនេះ មានភូមិសាស្ត្រអនាធិបតេយ្យក្តី។
ក្រោយកិច្ចប្រជុំបូកសរុបលទ្ធផលនៃយុទ្ធនាការបង្ក្រាបគ្រឿងញៀនរយៈពេល១ខែ លោក ជួន សុវណ្ណ បានប្តេជ្ញាអនុវត្តតាមប្រសាសន៍សម្តេច ស ខេង ប្រធានដឹកនាំយុទ្ធនាការប្រឆាំងគ្រឿងញៀនខុសច្បាប់ដែលជំរុញអាជ្ញាធរ និងសមត្ថកិច្ចក្នុងរាជធានីភ្នំពេញលុបបំបាត់តំបន់ប្រើប្រាស់ គ្រឿងញៀនត្រពាំងឈូក ជាដាច់ខាត។
អគ្គស្នងការរងនគរបាលជាតិ និងជាស្នងការរាជធានីភ្នំពេញរូបនេះ បានបង្ហើបប្រាប់ក្រុមអ្នកសារព័ត៌មាននៅថ្ងៃទី២ខែកុម្ភៈនេះថា កម្លាំងនគរបាល បានសម្គាល់មុខសញ្ញាមេខ្លោងជួញដូរ និងអ្នកប្រើប្រាស់គ្រឿងញៀនច្បាស់លាស់រួចអស់ហើយ នៅតាមមូលដ្ឋាននានាក្នុងរាជធានីភ្នំពេញ។ប៉ុន្តែ លោកទទួលស្គាល់ថា សមត្ថកិច្ចពុំទាន់អាចបង្ក្រាបបទល្មើសគ្រឿងញៀនដែលលួចលាក់ខ្លាំងក្នុងមូលដ្ឋានទាំងអស់នោះទេ។
លោក ជួន សុវណ្ណ បានលើកករណីការបង្ក្រាបគ្រឿងញៀនក្នុងតំបន់ត្រពាំងឈូក ដែលទល់មុខមន្ទីរពេទ្យព្រះកុសុមៈ ឬពេទ្យព្រះសង្ឃស្ថិតក្នុងសង្កាត់ទឹកថ្លា ខណ្ឌសែនសុខថា សមត្ថកិច្ចលំបាកបង្ក្រាបបទល្មើសក្នុងតំបន់នេះណាស់ ពីព្រោះវាមានសំណង់អនាធិបតេយ្យលំបាកគ្រប់គ្រងច្រើន។
ក្រោយបញ្ចប់កិច្ចប្រជុំបូកសរុបលទ្ធផលនៃយុទ្ធនាការបង្ក្រាបគ្រឿងញៀនលើកទី១ ប្រចាំខែមករា និងផ្សព្វផ្សាយសេចក្ដីសម្រេចរដ្ឋាភិបាលស្ដីពីការបង្កើតគណៈកម្មការចម្រុះប្រយុទ្ធប្រឆាំងគ្រឿងញៀន នៅថ្ងៃនេះលោកនាយកឧត្តមសេនីយ៍បញ្ជាក់ដូច្នេះ៖«នៅពេលកម្លាំងយើង (សមត្ថកិច្ច) ចុះអនុវត្តវិធានការបង្ក្រាបជនល្មើសតែងតែលោតចេញពីផ្ទះឈើ ផ្ទះស្លឹកហើយបណ្តែតចូលក្នុងទឹកបឹងហើយគាស់ជញ្ជាំងលោតចូលទឹក ទោះយើងក្លំជញ្ជាំងជិតក៏ដោយ»។
យ៉ាងណា លោកបានបញ្ជាក់ថា លោកនឹងខិតខំជំរុញការលុបបំបាត់បញ្ហាគ្រឿងញៀនក្នុងតំបន់ខាងលើ តាមប្រសាសន៍សម្តេច ស ខេង។ «តំបន់ត្រពាំងឈូកមិនអាចក្លាយជាតំបន់ដែលយើងមិនអាចគ្រប់គ្រងបាននោះទេ»។ស្នងការរាជធានីភ្នំពេញ បញ្ជាក់យ៉ាងខ្លី មុនពេលបញ្ចប់បទសម្ភាសន៍ដល់អ្នកសារព័ត៌មាន។
លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងក្នុងកិច្ចប្រជុំប្រឆាំងគ្រឿងញៀនក្នុងក្រសួងមហាផ្ទៃដែរថា យុទ្ធនាការប្រឆាំងគ្រឿងញៀននឹងមានគុណភាពខ្ពស់ ប្រសិនបើសមត្ថកិច្ចអាចបំបែកសម្បុកគ្រឿងញៀននៅត្រពាំងឈូកពិតមែន ក្នុងយុទ្ធនាការដំបូងនេះ។
«ខ្ញុំថា ក្នុងរយៈពេល៦ខែ ដោះបានតែបឹងឈូកមួយវាមានគុណភាពខ្ពស់ បើថាបឹងឈូកដោះមិនចេញទេ កន្លែងផ្សេងក៏វាគ្មានពិសោធន៍អ្វីត្រូវដោះបាន»។ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃនេះមុនសម្តេច ស ខេង ជំរុញការងារប្រឆាំងគ្រឿងញៀនជាប្រចាំដើម្បីលុបបំបាត់ការប្រើប្រាស់គ្រឿងញៀន នៅកម្ពុជា។
បន្ថែមលើសពីនេះ លោកបានស្នើអាជ្ញាធរពាក់ព័ន្ធទាំងថ្នាក់ជាតិ និងថ្នាក់ក្រោមបន្តជំរុញការងារស្រាវជ្រាវ រកមេខ្លោង និងទប់ស្កាត់ការចរាចរគ្រឿងញឿនតាមតំបន់គោលដៅសំខាន់ៗទាំងក្នុងប្រទេស និងតាមបណ្តោយច្រកព្រំដែនថែមទៀត។ «បើយើងចង់បានលទ្ធផល គួរមើលគោលដៅ»។លោក កែ គឹមយ៉ាន បញ្ជាក់។
របាយការណ៍បូកសរុបការបង្ក្រាបគ្រឿងញៀនលើកទី១ រយៈពេលមួយខែមករា ឆ្នាំ២០១៧នេះបានឲ្យដឹងថា សមត្ថកិច្ចបានបង្ក្រាបករណីគ្រឿងញៀនចំនួន១,១៤៤ករណីក្នុងនោះ ឃាត់ខ្លួនជនសង្ស័យអ្នកជួញដូរ និងអ្នកប្រើប្រាស់ចំនួន ២,៧៧៣នាក់ (ស្រី២៦៧នាក់) និងចាប់យកសារធាតុញៀនបានចំនួន ៩១៤៨.៥៣ក្រាម រថយន្ត១១គ្រឿង ម៉ូតូ២៥៧គ្រឿងទូរសព្ទដៃ៧០៣គ្រឿង៕
ថ្មីៗ
អត្ថបទ : រឿន ភារុន
No comments:
Post a Comment