មនុស្សរាប់ពាន់នាក់នាំគ្នាបាតុម្មនៅកណ្តាលទីក្រុងឡុងដ៍ នាថ្ងៃសៅរ៍ដែលជាផ្នែកមួយនៃចលនាប្រឆាំងប្រធានាធិបតីថ្មីរបស់សហរដ្ឋអាមេរិកលោក ដូណាល់ ត្រាំ ក៏ដូចជាសម្តីចំអាសចំអូងរបស់លោកដែលប៉ះពាល់ដល់ស្ត្រី។ ពួកគេទាមទារបណ្តេញត្រាំចេញពីតំណែងនិងប្រកាសការពារសិទ្ធិនិងសេចក្តីថ្លៃថ្នូររបស់ស្ត្រីទូទាំងពិភពលោក។
ចលនាបាតុកម្មរបស់ស្ត្រីកើតឡើងផុសផុលនៅបណ្តាទីក្រុងធំៗទូទាំងពិភពលោក ក្នុងនោះមាននៅក្រុងឡុង៍ផងដែរ។ បាតុកម្មនេះធ្វើឡើងដើម្បីប្រឆាំងប្រធានាធិបតីអាមេរិកទី ៤៥ ដែលឡើងកាន់អំណាច។ ប្រជាជនដែលចូលរួមបាតុកម្មនេះកើតទុក្ខមិនសុខចិត្ត នៅពេលដែលអ្នកនយោបាយប្រើសម្តីអាសគ្រាមប្រឆាំងស្ត្រីក្លាយជាមេដឹកនាំកំពូលអាមេរិកនោះ។ ហើយពួកគេចង់បង្ហាញថាខ្លួនកំពុងការពារសិទ្ធិស្ត្រីពិភពលោក។
យោងតាមទីភ្នាក់ងារព័ត៌មាន AFP បាតុករមិនមែនមានតែស្ត្រីទេ ក្នុងនោះមានបុរសនិងក្មេងៗដែរ ហើយពួកគេបានប្រមូលផ្តុំគ្នាជាក្រុមដង្ហែរក្បួនពីស្ថានទូតអាមេរិកប្រចាំអង់គ្លេសទៅកាន់ទីលាន Trafalgar ដោយស្រែកបន្ទរថា «ទម្លាក់ ត្រាំ» និងលើបដាដែលទាមទារឲ្យមានសិទ្ធិស្មើគ្នាគ្រវីចុះឡើង។
ក្នុងចំណោមបដាទាំងនោះមានខ្លះសរសេរថា៖« សម្ព័ន្ធភាពពិសេសជាមួយត្រាំ៖ គ្រាន់តែនិយាយថាទេ» ហើយខ្លះទៀតសរសេរថា៖« សិទ្ធិរបស់យើងមិនមែនសម្រាប់ការដកហូតឡើយរួមទាំងខ្លួនយើងផង»។
ក្នុងចំណោមបាតុករនោះមាន អ្នកបម្រើការងារក្នុងសារមន្ទីម្នាក់គឺ Hannah Bryant មានវ័យ ៣៤ឆ្នាំ។ នាងនាំកូនស្រី អាយុ ៤ឆ្នាំមកជាមួយដើម្បីទាមទារសិទ្ធិសេរីភាពឲ្យស្ត្រី។
«ខ្ញុំបានបង្ហរៀនកូនខ្ញុំពីសិទ្ធិសេរីភាពស្មើគ្នា និងបុរេនិច្ឆ័យ។ ខ្ញុំចង់ឲ្យនាងមើលឃើញថា តើមនុស្សច្រើនប៉ុណ្ណាជឿជាក់លើសិទ្ធិសេរីភាពស្មើគ្នានេះ»។ នេះជាសម្តីរបស់ស្ត្រី Hanna Bryant ។
គេមើលឃើញថា ក្នុងចំណោមអ្នកចូលរួមដង្ហែរក្បួនប្រឆាំងប្រធានធិបតីអាមេរិកថ្មីភាគច្រើនជាស្ត្រីជាម្តាយ និងកូនស្ត្រី ហើយពួកគេបម្រើការងារជាក្រុមអ្នកលើកស្ទួយសិទ្ធិស្ត្រី និងសកម្មជនសិទ្ធិមនុស្សផង។ លោកអភិបាលក្រុងឡុងដ៍ Sadiq Khan ដែលធ្លាប់មានរឿងចម្រូងចម្រាសជាមួយដូណាល់ ត្រាំ ក៏ចូលរួមក្នុងចលនាបាតុកម្មសកលនៅថ្ងៃសៅរ៍ទី ២១ មករានេះដែរ។
សូមបញ្ជាក់ថា លោក ដូណាល់ ត្រាំ បានស្បថចូលកាន់តំណែងក្លាយជាប្រធានាធិបតីទី ៤៥ នៅថ្ងៃ ២០មករា ប៉ុន្តែចលនាបាតុកម្មប្រឆាំងលោកក៏កើតឡើងផុសផុសដែរនៅអាមេរិកនិងបរទេស។បាតុករទាំងនោះបារម្ភពីការដកហូតសិទ្ធិ របស់ពួកគេនៅថ្ងៃណាមួយខាងមុខផងដែរ។ នេះក៏ដោយសារក្នុងការឃោសនាបោះឆ្នោតលោក ត្រាំ បានប្រើប្រាស់ពាក្យសម្តីអាសគ្រាមមាក់ងាយស្ត្រីភេទ និងប្រើប្រាស់ពាក្យសម្តីចម្រូងចម្រាសរើសអើងសាសនានិងពណ៌សម្បុរស្បែកថែមទៀត៕
ថ្មីៗ
អត្ថបទ : សៅ ផលនិស្ស័យ
No comments:
Post a Comment