ភ្នំពេញ: សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឲ្យ បើកការស៊ើបអង្កេត ស្រាវជ្រាវរកមេក្លោង មេឈ្មួញប្រព្រឹត្តបទល្មើសនេសាទ ដើម្បីឲ្យបទល្មើសជលផលនេសាទធ្លាក់ចុះ។
ការបញ្ជារបស់ រដ្ឋមន្ត្រីក្រសួងមហាផ្ទៃ បានធ្វើឡើងនៅក្នុង កិច្ចប្រជុំគណៈកម្មការ បង្ក្រាបទល្មើសនេសាទ លើផ្ទៃបឹងទន្លេសាប កាលពីព្រឹកថ្ងៃទី២៧ ខែមករា ឆ្នាំ២០១៧នេះ នៅទីស្តីការក្រសួងមហាផ្ទៃ។
លោកនាយឧត្តមសេនីយ គៀត ច័ន្ទថារឹទ្ធ អគ្គស្នងការរង នគរបាលជាតិ និងជាអ្នកនាំពាក្យ បានមានប្រសាសន៍ថា នៅក្នុងកិច្ចប្រជុំ សម្តេចក្រឡាហោម ស ខេង បានមានប្រសាសន៍ថា បន្ទាប់ពីស៊ើបអង្កេត ស្រាវជ្រាវ តាមឃាត់ខ្លួនមេក្លោង មេឈ្មួញកែនប្រជាពលរដ្ឋ ប្រព្រឹត្តិបទល្មើសនេសាទ បានហើយ ត្រូវចាប់ខ្លួន ចាត់វិធានការ អនុវត្តច្បាប់ ដោយគ្មានលើកលែង បញ្ជូនទៅតុលាការ ដាក់ពន្ធនាគារ ទៅតាមផ្លូវច្បាប់។
លោកបានបន្តថា សកម្មភាពការបង្ក្រាប បទល្មើសនេសាទ កន្លងមក គឺបានធ្វើឡើង ប្រឈមភាពលំបាក ដូចវែកចក ប៉ុន្តែទន្ទឹមនឹងនោះ គឺមានជនល្មើសជាច្រើន បានឃាត់ខ្លួន បញ្ជូនទៅតុលាការ និងមួយចំនួន ត្រូវបាននាំខ្លួន ធ្វើការណែនាំ ហើយបើមិនរាងចាល គឺត្រូវចាត់វិធានអនុវត្តច្បាប់ ចាប់បញ្ជូនទៅតុលាការផងដែរ។
ចំណេកលោក អេង ជាសាន ប្រតិភូរាជរដ្ឋាភិបាល ទទួលបន្ទុកអគ្គនាយកជលផល បានបញ្ជាក់ថា ក្រោយពីរាជរដ្ឋាភិបាល មានចាត់ការបង្ក្រាប បទល្មើសនេសាទ គឺបានធ្វើឲ្យផលត្រី បានកើនឡើង ប្រមាណជាង ៦% ក្នុងនោះទិន្នផលសរុបកើន ៨០៦ ពាន់តោន ខណៈទិន្នផលត្រី ឆ្នាំ២០១៦ មាន៧៥១ពាន់តោន។
តាមលទ្ធផល នៅក្រោយកិច្ចប្រជុំ ក្នុងឱកាសនេះផងដែរ គណៈកម្មការបង្ក្រាប បទល្មើសជលផល និងនេសាទ បានមើលឃើញថា ជាទូទៅ ខេត្តនៅជុំវិញបឹងទន្លេ គឺមានបទល្មើសនេសាទ បានកើតមានជាហូរហែរ ប៉ុន្តែក្រោយពេលបង្ក្រាប គឺមានចំនួន ២ រូបមាន ខេត្តកំពង់ឆ្នាំង និងខេត្តកំពង់ធំ បទល្មើសនោះ កំពុងជួបប្រឈមខ្លាំងជាងគេ ដែលបញ្ហានេះ សម្តេចក្រឡាហោម ស ខេង បានបញ្ជាឲ្យអភិបាលខេត្ត ទាំងនោះ ត្រូវពង្រឹង និងការមានចំណាត់ការ ចុះបង្ក្រាបឲ្យបានជាប់ជាប្រចាំ ហើយនៅពេលខាងមុខនេះ ក្រុមការងារថ្នាក់ជាតិ នឹងបន្តចុះទៅអន្តរាគមន៍។
បើតាមរបាយការណ៍បង្ក្រាប រយៈពេលជាង ១ខែ គិតពីចុងឆ្នាំ២០១៦ រហូតដល់ថ្ងៃទី២៦ ខែមករា ឆ្នាំ២០១៧នេះ កងកំលាំងអនុវត្តច្បាប់ បង្ក្រាបបទល្មើសនេសាទ បានប្រមាណ ៣២៨ ករណី ក្នុងនោះកំលាំង បានបំផ្លាញចោល និងរក្សាទុកភស្តុតាង បាន ៣១៦ ករណី និងឃាត់ខ្លួនជនល្មើស ៣៧រូប ស្មើ៧ករណី និងពិន័យអន្តរការ បាន៥ករណី៕
CEN
ដោយ: មុនីរាជ
No comments:
Post a Comment