ភ្នំពេញ: តាមគម្រោងផ្លូវអាកាសថ្មើរជើង ឆ្លងកាត់ទទឹងផ្លូវ ជាតិលេខ៤ នៅត្រង់ចំណុចផ្សារជម្ពូវ័ន្ត មួយកន្លែង និងមុខវិទ្យាល័យ ហ៊ុន សែនជម្ពូវ័ន្តនោះ គិតត្រឹមថ្ងៃទី២៦ ខែមករា ឆ្នាំ២០១៧ បានចាប់ផ្ដើមតម្លើង តួស្ពានហើយ ដែលគ្រោងដាក់ឲ្យ ដំណើរការឆ្លងកាត់ទៅមកបាន ក្នុងអំឡុងពាក់កណ្តាល ឆ្នាំ២០១៧នេះ ។
មន្ត្រីរដ្ឋបាលរាជធានីភ្នំពេញ បានឲ្យដឹងទៀតថា ការដ្ឋានស្ថាបនា ស្ពានអាកាស ឆ្លងកាត់ផ្លូវជាតិលេខ៤ សម្រាប់អ្នកថ្មើរជើងនោះ ពេលនេះ ត្រូវបានតម្លើងតួនៃស្ពាន ដែលមានបណ្តោយ ៤៥,៧ម៉ែត្រ ទទឹង៣,៦ម៉ែត្រ និងកម្ពស់ ៥,៥ម៉ែត្រ។ ចំពោះគម្រោងសាងសង់ស្ពាន និងការងារពង្រីកផ្លូវនេះ នឹងត្រូវប្រើរយៈពេល ប្រមាណ១៤ខែ គឺអាចបញ្ចប់នៅអំឡុង ពាក់កណ្តាល ឆ្នាំ២០១៧នេះ ។
មន្ត្រីដដែល បានឲ្យដឹងថា ស្របពេលជាមួយគ្នានេះដែរ រដ្ឋបាលរាជធានីភ្នំពេញ បាននិងកំពុងពង្រីក កំណាត់ផ្លូវជាតិលេខ៤ ចាប់ពីចំណុចភ្លើងស្តុប ផ្លូវលេខ២០១១ ដល់រង្វង់មូលចោមចៅ បន្ទាប់មក នឹងបន្តពីរង្វង់មូលចោមចៅ ដល់ផ្លូវកប់ស្រូវ។ មន្ត្រីបន្តទៀតថា គម្រោងនេះ មានស្ថាបនាផ្លូវអាកាស ថ្មើរជើងចំនួន២កន្លែង ដាក់លូប្រអប់ លូចំហអមសងខាងផ្លូវ លាបគំនូសចរាចរ ដាក់ស្លាកសញាចរាចរ និងតម្លើងបង្គោលភ្លើងព្រែកជា២ផងដែរ ។
កន្លងទៅនេះដែរ លោក ប៉ា សុជាតិវង្ស អភិបាលរាជធានីភ្នំពេញ ធ្លាប់មានប្រសាសន៍ថា៖ ការពង្រីកកំណាត់ផ្លូវជាតិលេខ៤ និងគម្រោងស្ថាបនា ស្ពានអាកាសថ្មើជើងខាងលើនេះ ដើម្បីដោះស្រាយ ការកកស្ទះចរាចរ ដែលជាបញ្ហាប្រឈម របស់អាជ្ញាធរភ្នំពេញ នាពេលបច្ចុប្បន្ន ។ គម្រោងនេះ បានដាក់លូមុនគេ ចាប់ពីមុខផ្សារជម្ពូវ័ន្ត ទៅរង្វង់មូលចោមចៅ ហើយកំណាត់ផ្លូវជាតិលេខ៤នេះ ក៏ត្រូវពង្រីក ចាប់ពីរង្វង់មូលចោមចៅ ដល់ចំណុចផ្លូវបំបែកកប់ស្រូវ គឺសម្រាប់ ៣ ខ្សែរថយន្តទៅ ៣ខ្សែមក និងផ្លូវសម្រាប់ទោចក្រយានយន្ត ១ខ្សែមក សងខាងតែម្តង ។
តាមរយៈ ការសិក្សាស្រាវជ្រាវ របស់មន្ត្រីជំនាញ រដ្ឋបាលរាជធានីភ្នំពេញ បានបង្ហាញថា ចំនួនអ្នកថ្មើរជើង ឆ្លងកាត់ផ្លូវជាតិលេខ៤ ត្រង់ចំណុចមុខ វិទ្យាល័យជម្ពូវ័ន្ត ឬផ្សារជម្ពូវ័ន្តនោះ មានប្រមាណជាង ១ ម៉ឺននាក់ ក្នុងមួយថ្ងៃ ក្នុងនោះសិស្សសាលា មានជាង ៥ ពាន់នាក់ ក្នុងមួយថ្ងៃ ៕
CEN
ដោយ: ដាវុធ
No comments:
Post a Comment