អតីតប្រធានាធិបតិអាមេរិក បារ៉ាក់ អូបាម៉ា បានប្រើប្រាស់ពេលចុងក្រោយនៃការកាន់អំណាចដើម្បីផ្ទេរទឹកប្រាក់ដល់ទៅ២២១លានដុល្លារទៅឲ្យប៉ាឡេស្ទីន និងជាច្រើនលានដុល្លារទៀតទៅឲ្យកម្មវិធីអភិវឌ្ឍ និងអង្គការសហប្រជាជាតិជាដើម។ ទឹកប្រាក់ដ៏ច្រើនសម្រាប់ប៉ាឡេស្ទីនដែលលោក អូបាម៉ា ឆ្លៀតផ្ដល់ឲ្យតែប៉ុន្មានម៉ោងមុនការស្បថចូលកាន់អំណាចរបស់លោក ដូណាល់ ត្រាំ គឺជាទឹកប្រាក់ដែលរដ្ឋសភារារាំងពេលកន្លងមក ដ្បិតប៉ាឡេស្ទីនស្វែងរកសមាជិកភាពនៅតាមអង្គការអន្តរជាតិនានា។
សឹងតែផុតអាណត្តិទៅហើយ លោក បារ៉ាក់ អូបាម៉ា បានសម្រេចចិត្តបញ្ជូនលុយសន្ធឹកសន្ធាប់ដល់ទៅ២២១លានដុល្លារ ទៅឲ្យប៉ាឡេស្ទីន។ មន្ត្រីក្រសួងការបរទេស និងអ្នកស្និទ្ធសមាជិករដ្ឋសភា បានប្រាប់ទីភ្នាក់ងារព័ត៌មាន AP ថា រដ្ឋបាលចប់អាណត្តិរបស់លោក អូបាម៉ា បានផ្ដល់ដំណឹងឲ្យសភាពីរឿងផ្ទេរលុយទៅប៉ាឡេស្ទីននៅព្រឹកថ្ងៃទី២០ ខែមករា គឺតែប៉ុន្មានម៉ោងមុនលោក ដូណាល់ ត្រាំ ក្លាយជាប្រធានាធិបតីតី៤៥ ។
មន្ត្រីក្រសួងការបរទេសដដែលបន្តថា អតីតរដ្ឋមន្ត្រីការបរទេស ចន ឃែរី ក៏បានជូនដំណឹងនេះទៅកាន់សមាជិករដ្ឋសភាខ្លះ មុនពេលលោកចាកចេញពីទីស្ដីការក្រសួង។ ចំណែកអ្នកមានទំនាក់ទំនងជិតស្និទ្ធនឹងសភា ក៏បញ្ជាក់ដែរថា លិខិតជូនដំណឹងចុះថ្ងៃទី២០ ខែមករា ត្រូវបានបញ្ជូនទៅកាន់រដ្ឋសភាតែរយៈពេលខ្លីមុនពិធីស្បថចូលកាន់តំណែងរបស់ប្រធានាធិបតី ដូណាល់ ត្រាំ ចាប់ផ្ដើម។
ជាមួយនឹងការផ្ដល់ទឹកប្រាក់ដ៏ច្រើននេះ អតីតប្រធានាធិបតី អូបាម៉ា បានទាត់ចោលការសម្រេចរបស់សមាជិកខ្លះរដ្ឋសភា ដែលជំទាស់ការផ្ដល់ហិរញ្ញវត្ថុទៅឲ្យប៉ាឡេស្ទីន។ សារព័ត៌មាន Fox News ផ្សាយថា ទឹកប្រាក់ដែលត្រូវផ្ដល់ឲ្យនេះ បានមកពីទីភ្នាក់ងារអាមេរិកសម្រាប់ការអភិវឌ្ឍអន្តរជាតិ និងមានគោលដៅជួយគាំទ្រការផ្ដល់ជំនួយមនុស្សធម៌ និងការកែទម្រង់នយោបាយ និងសន្តិសុខនៅទឹកដីប៉ាឡេស្ទីន។
អ្វីគួរឲ្យកត់សម្គាល់នោះ នៅរយៈពេលចុងក្រោយនៃអាណត្តិដឹកនាំ លោក អូបាម៉ា បានបន្ទន់ជំហរដាក់ប៉ាឡេស្ទីន បើទោះជាធ្វើឲ្យអ៊ីស្រាអែល ជាសម្ព័ន្ធមិត្តយូរអង្វែងខឹងសម្បារមិនសប្បាយចិត្តក្ដី។ កាលពីខែធ្នូ ឆ្នាំ២០១៦ អាមេរិក ថែមទាំងបោះឆ្នោតមិនប្រឆាំងលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានថ្កោលទោសសកម្មភាពបំពានរបស់អ៊ីស្រាអែលលើទឹកដីប៉ាឡេស្ទីនទៀតផង។
ពេលនោះ រដ្ឋាភិបាលនាយករដ្ឋមន្ត្រី បេនចាមីន ណេតាន់យ៉ាហ៊ូ ខឹងរដ្ឋបាលអតីតប្រធានាធិបតី អូបាម៉ា យ៉ាងខ្លាំង និងថែមទាំប្រើពាក្យរិះគន់ធ្ងន់ៗទៀតផង ដ្បិតអាមេរិកមិនដែលបោះឆ្នោតមិនប្រឆាំងបែបនេះឡើយ នៅពេលក្រុមប្រឹក្សាសន្តិសុខព្យាយាមចេញសេចក្ដីសម្រេចថ្កោលទោសអ៊ីស្រាអែលនោះ។ អ៊ីស្រាអែល ក៏យល់ថា រដ្ឋបាលលោក អូបាម៉ា បានបោះបង់ការគាំទ្រលើរដ្ឋជ្វីហ្វមួយនេះដែរ ហើយការផ្ទេរលុយនេះទៀតសោត ប្រាកដជាធ្វើឲ្យអ៊ីស្រាអែលខកចិត្តទៀតមិនខាន៕
ថ្មីៗ
អត្ថបទ : តន ចាន់រិទ្ធារ៉ា
No comments:
Post a Comment