រដ្ឋាភិបាលចក្រភពអង់គ្លេសរបស់នាយករដ្ឋមន្ត្រី Theresa May បានចាប់ផ្ដើមជំហានដំបូងនៃដំណើរការចាកចេញពីសហភាពអឺរ៉ុបហើយ។ សេចក្ដីស្នើច្បាប់ដែលបើកផ្លូវឲ្យរដ្ឋាភិបាលអនុវត្តតាមមាត្រា៥០ នៃសន្ធិសញ្ញា Lisbon ត្រូវបានបញ្ជូនទៅកាន់សភានៅថ្ងៃទី២៦ ខែមករា ដើម្បីពិភាក្សា មុននឹងចក្រភពអង់គ្លេសចាប់ផ្ដើមការចរចាចាកចេញជាមួយសហភាពអឺរ៉ុប។ សេចក្ដីស្នើច្បាប់នេះ ទំនងជាអាចឆ្លងផុតដំណាក់ជជែកដេញក្នុងសភា ដ្បិតមេដឹកនាំបក្សប្រឆាំងក៏បានបង្ហាញជំហរគាំទ្រផងដែរ។
បន្ទាប់ពីចាញ់ក្ដីនៅឯតុលាការកំពូល រដ្ឋាភិបាលចក្រភពអង់គ្លេស ក៏បានបញ្ជូនសេចក្ដីស្នើច្បាប់ស្ដីពី «ការជូនដំណឹងនៃការចាកចេញពីសហភាពអឺរ៉ុបឆ្នាំ២០១៧»ទៅកាន់សភាដើម្បីបោះឆ្នោតអនុម័ត។ សេចក្ដីស្នើច្បាប់នេះ នឹងផ្ដល់អំណាចឲ្យនាយករដ្ឋមន្ត្រី Theresa May អនុវត្តតាមមាត្រា៥០ នៃសន្ធិសញ្ញា Lisbon ក៏ដូចជាដំណើរការចរចាផ្សេងៗជាមួយសហភាពអឺរ៉ុប បន្ទាប់ពីតុលាការកំពូលផ្ដល់សិទ្ធិឲ្យសភាជាអ្នកសម្រេចចុងក្រោយលើដំណើរការចរចានេះ។
សូមស្តាប់ព័ត៌មានលម្អិត៖
សេចក្ដីស្នើច្បាប់នេះ មានតែ២មាត្រា មាន៨ជួរ និង១៣៧ពាក្យប៉ុណ្ណោះ។ សេចក្ដីស្នើច្បាប់ដ៏ខ្លីនេះ មានគោលដៅប្រគល់អំណាចឲ្យនាយករដ្ឋមន្ត្រី ដើម្បីផ្ដល់ដំណឹងពីគោលបំណងរបស់ចក្រភពអង់គ្លេសក្នុងការចាកចេញពីសហភាពអឺរ៉ុប ដោយអនុលោមតាមមាត្រា៥០ សន្ធិសញ្ញា Lisbon ។ ម្យ៉ាងទៀត ការប្រគល់សិទ្ធិឲ្យនាយករដ្ឋមន្ត្រីលើរឿងនេះ ក៏មានអំណាចគ្របដណ្ដប់លើបទបញ្ញត្តិផ្សេងៗនៃច្បាប់សហភាពអឺរ៉ុបឆ្នាំ១៩៧២ ឬក៏ច្បាប់ផ្សេងទៀតដែរ។
ភ្លាមៗបន្ទាប់ពីសេចក្ដីស្នើច្បាប់នេះចេញជារូបរាង រដ្ឋាភិបាលចក្រភពអង់គ្លេស ក៏ប្រកាសដែរថា សភាជាន់ទាបនឹងមានពេលតែ៥ថ្ងៃប៉ុណ្ណោះ ដើម្បីជជែកដេញដោលលើសេចក្ដីស្នើច្បាប់នេះ ដែលរឿងនេះធ្វើឲ្យសមាជិកសភាជាច្រើន ជាពិសេសសមាជិកសភាមកពីបក្សពលករ មិនពេញចិត្តឡើយ។ ពួកគេ និយាយថា ចំនួន៥ថ្ងៃ គឺមិនគ្រប់គ្រាន់ដើម្បីពិភាក្សាបញ្ហាដ៏សំខាន់នេះឡើយ ហើយបក្សពលករ ក៏ថែមទាំងស្នើឲ្យមានការកែប្រែសំណើច្បាប់ថ្មីនេះទៀតផង។
អ្វីដែលគួរឲ្យកត់សម្គាល់នោះ សេចក្ដីស្នើច្បាប់ដដែលនេះ មិនបានដាក់បញ្ជូលកាលបរិច្ឆេទដែលនាយករដ្ឋមន្ត្រី Theresa May ត្រូវអនុវត្តតាមមាត្រា៥០ សន្ធិសញ្ញា Lisbon ដែរ។ យោងតាមសារព័ត៌មាន The Guardian អ្នកនាំពាក្យក្រសួងទទួលបន្ទុកចាកចេញពីសហភាពអឺរ៉ុបបញ្ជាក់ថា វាមិនមែនជាដំណើរការផ្លូវការទេដែលត្រូវដាក់ពេលវេលាកំណត់ថ្ងៃទី៣១ ខែមីនា ទៅក្នុងសេចក្ដីស្នើច្បាប់នោះ។ ចំណែកឯសភាវិញ ក៏ធ្លាប់បោះឆ្នោតគាំទ្រកាលបរិច្ឆេទនៃការចរចារួចហើយដែរ។
១. បក្សប្រឆាំងពលករ ជ្រួលប្របល់
ប្រធានគណបក្សពលករ លោក Jeremy Corbyn បានបង្ហាញជំំហរគាំទ្រលើសេចក្ដីស្នើច្បាប់ដែលដាក់ដោយរដ្ឋាភិបាលលោកស្រី Theresa May ។ ហើយលោកក៏នឹងបង្ខំឲ្យសមាជិកសភាបក្សពលករទាំងអស់ ផ្ដល់ការគាំទ្រសេចក្ដីស្នើច្បាប់នេះ ដែលនេះអាចនឹងធ្វើឲ្យបក្សប្រឆាំងមួយនេះរង្គោះរង្គើមិនខានឡើយ។ សមាជិកសភាបក្សនេះ ចង់ឲ្យលោក Corbyn បោះឆ្នោតប្រឆាំងលើថេរវេលានៃការពិភាក្សាដែលកំណត់ត្រឹម៥ថ្ងៃ រួចស្នើបន្ថែមរយៈពេលជជែកដេញដោលឲ្យបានច្រើនថែមទៀត។
ប្រភពព័ត៌មានខាងលើបន្តថា សភាជាន់ទាបអង់គ្លេស នឹងពិភាក្សាលើសេចក្ដីស្នើច្បាប់នេះនៅថ្ងៃអង្គារ និងថ្ងៃពុធសប្ដាហ៍ក្រោយ។ បន្ទាប់ពីមក សមាជិកសភា នឹងបន្តប្រើពេលបីថ្ងៃដែលនៅសល់សម្រាប់បញ្ចប់ការជជែកដេញដោលលើសេចក្ដីស្នើច្បាប់ មុននឹងបញ្ជូនបន្តទៅកាន់សភាជាន់ខ្ពស់ពិភាក្សាដេញដោលទៀត។
ជាមួយគ្នានេះដែរ បក្សពលករ ក៏បានដាក់សំណើកែប្រែចំណុចខ្លះនៃសេចក្ដីស្នើច្បាប់នេះដែរ ជាពិសេសបក្សនេះចង់ឲ្យមានការធានាថា នឹងមានការបោះឆ្នោតនៅសភាលើកិច្ចព្រមព្រៀងណាមួយដែលសម្រេចបានដោយរដ្ឋាភិបាល និងសហភាពអឺរ៉ុប។ បក្សពលករ ក៏ចង់ឲ្យសេចក្ដីស្នើច្បាប់នេះ ចែងពីសិទ្ធិរបស់ពលករ ព្រមទាំងទាមទារឲ្យរដ្ឋមន្ត្រីទទួលបន្ទុកការចាកចេញ ធ្វើរបាយការណ៍ស្ដីពីដំណើរការចាកចេញនៅរៀងរាល់ពីរខែម្ដងទៅឲ្យសភា។
អ្វីដែលគួរឲ្យចាប់អារម្មណ៍នោះ មិនយូរប៉ុន្មានក្រោយលោក Corbyn និយាយថា លោកនឹងបង្ខំឲ្យសមាជិកសភាបក្សពលករបោះឆ្នោតគាំទ្រសេចក្ដីស្នើច្បាប់របស់រដ្ឋាភិបាល លោកស្រី Tulip Siddiq សមាជិកសភា និងជារដ្ឋមន្ត្រីស្រមោលរបស់សភា ក៏បានលាលែងពីតំណែងភ្លាមៗតែម្ដង។ លោកស្រីអះអាងថា ប្រជាជនអង់គ្លេសក្នុងមណ្ឌលរបស់លោកស្រីជ្រើសរើសការបន្តជាសមាជិកសហភាពអឺរ៉ុប ដូចនេះលោកស្រី មិនអាចបោះឆ្នោតប្រឆាំងមតិពួកគេឡើយ។
ការចាកចេញរបស់លោកស្រី Tulip Siddiq បានបង្ហាញពីការមិនចុះសម្រុងក្នុងចំណោមសមាជិកសភាបក្សពលករ និងថ្នាក់ដឹកនាំគណបក្សនេះ។ ជាការពិត គណបក្សពលករ មានជំហរគាំទ្រការចាកចេញពីសហភាពអឺរ៉ុបតាំងតែពីការយុទ្ធនាការធ្វើប្រជាមតិខែមិថុនា ឆ្នាំ២០១៦ ។ អាស្រ័យហេតុនេះ ទើបលោក Corbyn ព្យាយាមបញ្ចុះបញ្ចូលសមាជិកសភាបក្សរបស់លោក ឲ្យគាំទ្រសំណើលើកនេះ និងជួយកែប្រែ ជាជាងបោះឆ្នោតប្រឆាំង ដែលអាចរារាំងការចាកចេញបាននោះ។
២. អ្វីជាជំហានបន្ទាប់ ក្នុងករណីសេចក្ដីស្នើច្បាប់ត្រូវបានអនុម័ត?
ជំហានបន្ទាប់នោះ គឺចក្រភភពអង់គ្លេស នឹងជូនដំណឹងទៅអឺរ៉ុប ពីការចាកចេញរបស់ខ្លួន ក្នុងករណីដែលស្ថាប័ននីតិបញ្ញត្តិរបស់ប្រទេសអនុម័តសេចក្ដីស្នើច្បាប់ដ៏ខ្លីមួយនេះ។ បន្តពីនេះ នាយករដ្ឋមន្ត្រីTheresa May ដែលជ្រើសរើសការចាកចេញឲ្យដាច់ស្រឡះ នឹងផ្ដើមការចរចាជាមួយសហភាពអឺរ៉ុប ដើម្បីសម្រេចកិច្ចព្រមព្រៀងមួយ ដែលនាំដល់ការចាកចេញនេះ។ យ៉ាងណាមិញ ប្រសិនបើគ្មានកិច្ចព្រមព្រៀង ត្រូវបានសម្រេចទេនោះ គេត្រូវរង់ចាំដល់ទៅពីរឆ្នាំទៅមុខ ទើបច្បាប់ និងបទបញ្ញតិផ្សេងៗ របស់អឺរ៉ុប អស់សុពលភាពអនុវត្តក្នុងទឹកដីចក្រភពអង់គ្លេសតទៅទៀត។
នៅពេលសម្រេចបានកិច្ចព្រមព្រៀងណាមួយក្នុងដំណាក់កាលចរចាជាមួយអឺរ៉ុប រដ្ឋាភិបាលអង់គ្លេស ចាំបាច់បញ្ជូនកិច្ចព្រមព្រៀងនោះ ទៅសុំការយល់ព្រមពីសភាសិន។ ដំណើរការនេះ ត្រូវបានកំណត់ដោយតុលាការកំពូលអង់គ្លេស ដែលផ្ដល់សិទ្ធិឲ្យសភាជាអ្នកសម្រេចចុងក្រោយ។ នេះមានន័យថា រដ្ឋាភិបាលនាយករដ្ឋមន្ត្រី Theresa May មិនអាចចាប់ផ្ដើមការចរចាទាំងឡាយណាជាមួយសហភាពអឺរ៉ុប ដោយគ្មានការអនុញ្ញាតពីសំណាក់ស្ថាប័ននីតិបញ្ញត្តិនោះឡើយ៕
ថ្មីៗ
អត្ថបទ : តន ចាន់រិទ្ធារ៉ា
No comments:
Post a Comment