ភ្នំពេញ ៖ លោក Nick Beresford នាយកស្ថានតំណាងថ្មីរបស់អង្គការ UNDP ប្រចាំនៅកម្ពុជាបានសម្តែងនូវការប្តេជ្ញាចិត្តខ្ពស់ក្នុងការខិតខំបំពេញបេសកកម្មតាមអាណត្តិកិច្ចរបស់អង្គការ UNDP ដើម្បីបន្តរួមចំណែកគាំទ្ររាជរដ្ឋាភិបាល លើការអភិវឌ្ឍសង្គម និងការអភិវឌ្ឍធនធានមនុស្សនៅកម្ពុជា។
នាយកស្ថានតំណាងថ្មីនៃអង្គការ UNDP ប្រចាំនៅកម្ពុជា បានថ្លែងដូច្នេះក្នុងឱកាស ដែលបានជួបពិភាក្សាការងារជាមួយលោក បណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង នៅទីស្តីការក្រសួងសេដ្ឋកិច្ច និងហិរញ្ញវត្ថុ កាលពីព្រឹកថ្ងៃទី ២៥ ខែឧសភា ឆ្នាំ២០១៦ នេះ។
ក្នុងឱកាសនោះដែរ លោក អូន ព័ន្ធមុនីរ័ត្ន បានថ្លែងស្វាគមន៍ និងអបអរសាទរចំពោះលោក Nick Beresford ដែលត្រូវបានតែងតាំងជានាយកស្ថានតំណាងអង្គការ UNDP ប្រចាំកម្ពុជា កាលពីពេលថ្មីៗនេះ និងបានវាយតម្លៃខ្ពស់ចំពោះ បេសកកម្មការងាររបស់លោក Nick Beresford ក្នុងការបន្តជួយពង្រឹង លើកកម្ពស់កិច្ចសហប្រតិបត្តិការដើម្បីអភិវឌ្ឍន៍រវាងរាជរដ្ឋាភិបាលកម្ពុជា ជាមួយអង្គការ UNDP។
លោក Nick Beresford បានថ្លែងអំណរគុណចំពោះលោកទេសរដ្ឋមន្ត្រី ដែលបានអនុញ្ញាតឲ្យរូបលោកផ្ទាល់ចូលជួបសម្តែងការគួរសម ក្នុងឱកាសនៃការចាប់ផ្តើមបំពេញបេសកកម្មថ្មីនៅកម្ពុជា និងបានថ្លែងកោតសរសើរចំពោះសមិទ្ធផល ដែលរាជរដ្ឋាភិបាលសម្រេចបានក្នុងរយៈពេលទសវត្សរ៍ចុងក្រោយនេះ ជាពិសេសកំណើនសេដ្ឋកិច្ចក្នុងល្បឿនលឿនរបស់កម្ពុជា។
លោកនាយកស្ថានតំណាងថ្មី ក៏បានសម្តែងនូវការប្ដេជ្ញាចិត្តខ្ពស់ក្នុងការខិតខំបំពេញបេសកកម្មតាមអាណត្តិកិច្ចរបស់អង្គការ UNDP ដើម្បីបន្តរួមចំណែកគាំទ្ររាជរដ្ឋាភិបាល លើការអភិវឌ្ឍសង្គម និងការអភិវឌ្ឍធនធានមនុស្សនៅកម្ពុជា។
ឆ្លៀតឱកាសនេះ លោកបណ្ឌិតទេសរដ្ឋមន្ត្រី ក៏បានជម្រាបសង្ខេបពីស្ថានភាពសេដ្ឋកិច្ច ដែលសម្រេចបានកំណើន ជុំវិញ ៧% ក្នុងឆ្នាំ ២០១៥ និងការព្យាករកំណើនសេដ្ឋកិច្ច ដែលអាចនឹងសម្រេចបានប្រមាណ ៧,១% ក្នុងឆ្នាំ២០១៦ នេះផងដែរ។ ក្នុងរយៈពេលមធ្យម ចក្ខុវិស័យអនាគតកម្ពុជានៅតែមានលក្ខណៈជាវិជ្ជមានបន្តទៀត មានន័យថា សេដ្ឋកិច្ចកម្ពុជាត្រូវបានគេរំពឹងថានឹងមានកំណើនប្រមាណ៧% ក្នុងមួយឆ្នាំ។ កំណើនសេដ្ឋកិច្ចនេះ នឹងធ្វើឲ្យចំណូលប្រចាំឆ្នាំរបស់ប្រជាជនកម្ពុជាកើនទ្បើងជាលំដាប់។ ប្រទេសកម្ពុជាមានចក្ខុវិស័យចង់ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានចំណូលខ្ពស់នៅឆ្នាំ ២០៥០ ហើយដើម្បីកម្ពុជាសម្រេចបាននូវចក្ខុវិស័យ នោះ រដ្ឋាភិបាលត្រូវបន្តផ្តោតការយកចិត្តទុកដាក់ខ្លាំងលើការអភិវឌ្ឍធនធានមនុស្ស ភាពច្នៃប្រឌិតនិងជំនាញដែលជាកត្តាសំខាន់ក្នុងការទ្រទ្រង់កំណើនសេដ្ឋកិច្ចជាតិ ស្របក្នុងយុគសម័យ ដែលមានការប្រកួតប្រជែងផ្នែកសេដ្ឋកិច្ច និងបច្ចេកវិទ្យាព័ត៌មាន និងការផ្លាស់ប្តូរដោយមិនបានគ្រោងទុក។
ជាមួយគ្នានេះ លោក Nick Beresford បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងភាពជាម្ចាស់ដែលសម្រេចបាននូវកិច្ចអភិវឌ្ឍក្នុងសន្ទុះលឿន ប្រកបដោយផ្លែផ្កា និងបានជម្រាបជូនថា UNDP នឹងបន្តចូលរួមចំណែកដល់ការបន្តជំរុញកិច្ចអភិវឌ្ឍន៍នៅកម្ពុជាតាមរយៈការអភិវឌ្ឍសមត្ថភាពស្ថាប័ន ធនធានមនុស្ស និងការផ្តល់ជំនួយបច្ចេកទេស។
ជាមួយគ្នានេះ លោក Nick Beresford បានថ្លែងអំណរគុណចំពោះលោកទេសរដ្ឋមន្ត្រី ដែលបានអនុញ្ញាតឲ្យរូបលោកចូលជួបសម្តែងការគួរសម និងរាយការណ៍ការងារពាក់ព័ន្ធនឹងសកម្មភាពរបស់ UNDP ៕
កម្ពុជាថ្មី
សុជាតា
No comments:
Post a Comment